Өлке туралы жаңа басылымдар

Дүйсембекова Ш.Әлеуметтік педагогика.- Семей, 2016. – 116 б.

Оқу құралында негізгі әлеуметтік педагогиканың мазмұны қысқаша берілген. Барлық тақырыптар дәріс материалының негізінде жазылған.Мұнда оқылатын мәселелер мен міндеттердің тәжірибелік бағыттылығына, студенттердің қолданбалы әлеуметтік зерттеулерді оқу кезеңінде және бұдан кейін тікелей студенттік қауымымен ұйымдастыру мен өткізу дағдыларын жетілдіруге көп көңіл бөлінеді.

Тобықты Мамай батыр, би:Тарихи танымдық жинақ / Құраст. М. Жанболатұлы. – Алматы, 2015.- 340 б.

Бұл жинаққа қазақ-қалмақ соғысында ерлігімен ерекше танылған Бөгенбай, Қабанбай батырларға серік болып, хан Абылайдың ризалығына бөленген әйгілі батыр, би – Мамай Жұмағұлұлының өмір дерегі, қаһарман ерлігі, адами болмысы, ұрпақтарының шежіресі туралы зерттеу еңбектері, естеліктер мен ел аузындағы әңгімелер топтастырылған. Батыр бабасына деген ел құрметінен, ұрпақ ықыласынан туған арнау, толғау, әндері мен өлең, поэма, дастандары қамтылды.

Семейдің облыстық тарихи-өлкетану музейінің экспозициясы бойынша Жол көрсеткіш. – Семей, 2014. – 101 б.

Жолкөрсеткіште музей туралы және музейдің әрбір залы туралы ақпарат ұсынылған. Мұражайдың «Палеонтология және геология» залы, «Табиғат залы», «Археология және өлке тарихы» залы, «Этнография» залы, «Қаланың 20 ғасырдың басындағы тарихы» залы, «Семей Қазақстан Республикасы Тәуелсіздігі жылдарында» залы, «Көрме» залы, «Семейліктер Ұлы Отан соғысы жылдарында” залы, “Ғылыми кітапхана» залы туралы экспозициялық көрме және жәдігерлермен таныстырады.

Әлин М. «Тұлға Орал Арғынбекұлы». – Семей, 2016. – 296 б.

Қазақстан Журналистер Одағының мүшесі, белгілі қаламгер Мұрат Әлиннің бұл кітабында Абай ауданы, Архат өңірінде туып, осы өлкенің екі шаруашылығында өнімді еңбек етіп, Мақаншы, Абай аудандарын, кейіннен облыстық халыққа әлеуметтік қызмет көрсету саласын басқарып, артына өшпес із, айшықты іс қалдырған жаны жайсаң бірегей тұлға Орал Арғынбекұлының өмір жолын, ел есінде қалған табысты істерін сөз етеді. Кейіпкердің келбеті кейінгі ұрпаққа үлгі болады деп білеміз.

Тәбәрікұлы С. Тұлпардың ізі өшпейді: Хикаят, сыр-дастан, естеліктер. – Алматы: «Халықаралық жазылым агенттігі» ЖШС. – 2016. – 332 б.

Тәуелсіздік жолында, азаттық үшін тынымсыз күрес жалғасып, бүгінгіге дейін арқау – желісін үзбей келе жатуы, өзекті күресі ұтімді жазылған. Полигон ошағы болған Абыралының тау-тас, құз биігі Қобыланды, Дегелең жайлы тебіренісі мен адамдар тағдыры аянышпен таңданысқа, ойға жетелейді. Кітап қалың оқырманға, өміршең өршіл жастарға, студенттерге арналған. Кітаптан ел қорғаған батырлар, кемеңгер кемел билер туралы мәліметтерді табуға болады.

Семейдегі Ф.М. Достоевскийдің әдеби-мемориалдық мұражайы: Жолсілтегіш. – Семей, 2012. – 118 б.

Ресей жерінен тыс орналасқан жалғыз мұражай – Семей қаласындағы Ф.М. Достоевскийдің әдеби-мемориалдық мұражайы. Бұл басылым әлемдік әдебиетте өзіндік орны бар, ұлы жазушының мұрасымен, мұражай тарихы, экспозициялық, мемориалдық құжаттарымен таныстырады.

Шығыс Қазақстан облыстық Невзоровтар отбасы атындағы бейнелеу өнері мұражайының жинағындағы Невзоровтар отбасы тартуларының Каталогы. – Семей, 2013. – 263 б.

Семей қаласындағы бейнелеу өнері мұражайы Невзоровтардың сый тартуларын қабылдап, қылқалам туындылар топтамасын сақтауды, зерттеуді және насихаттауды үлкен ықыласпен және маңыздылықпен құптады. Ұзақ жылдар бойы жинақтардың ғылыми тізімдеуі бойынша жұмыстар өткізілді, олардың көптеген бөлігі тұрақты экспозицияға кірген. Осы каталог Невзоровтардың толық сый тартуларын енгізеді.

Беттер: 1 2 3 4 5 6 7