Жүрегі жырдан жаралған: поэзия кеші
18 наурыз күні М.О. Әуезов атындағы педагогикалық колледжінде Абай облыстық әмбебап кітапханасының қызметкерлерінің ұйымдастыруымен қазақтың көрнекті ақыны, Қазақстанның халық жазушысы Тұманбай Молдағалиевтің 90 жылдық мерейтойына арналған «Жүрегі жырдан жаралған» атты поэзия кеші өтті.
Әдеби кешке ҚТ 24-09 тобының студенттері белсене қатысып, ақын шығармашылығынан өлеңдер оқып, ән шырқап, өз өнерлерін паш етті. Шараның негізгі мақсаты – Тұманбай Молдағалиевтің қазақ поэзиясындағы ерекше орны мен оның шығармашылығын жас буынға насихаттау, өлеңсүйер қауымға ақын мұрасының тереңдігін таныстыру болды.
Кеш барысында студенттер ақынның жүрек тебірентерлік лирикалық жырларын оқып, әсерлі әндерін орындап, тыңдармандарға ерекше рухани әсер сыйлады. Сонымен қатар, қатысушыларға Тұманбай Молдағалиевтің өмір жолы мен шығармашылық кезеңдері кеңінен таныстырылып, ақынның замандастары мен қаламдастарының естеліктерінен үзінділер ұсынылды.
Әдеби кешке жиналған оқырмандар ақынның мұрасына деген құрметін білдіріп, оның өлеңдеріндегі нәзік лирика мен туған елге, махаббатқа деген шынайы сезімнің көрінісін талқылады. Кешті ұйымдастыруға белсене атсалысқан ҚТ 24-09 тобының жетекшісі Ақжол Қадылбекұлы мен колледж оқытушылары жастардың шығармашылық дамуына зор үлес қосты.