Бүгін менің туған күнім: әдеби-сазды поэзиялық кеш

Абай кітапханасында 9 ақпан күні  саф өлеңнің жүйрігі, ақиық ақын, қазақ поэзиясының мұзбалағы, Мұқағали Мақатаевтың  туылған күніне орай  «Бүгін менің туған күнім» атты әдеби-сазды поэзиялық кеш ұйымдастырылды. Кешке қаламыздағы Шәкәрім атындағы Семей мемлекеттік университетінің, Қазақ инновациялық гуманитарлық-заң университеті мен М. Төлебаев атындағы музыкалық училищенің студенттері,  Т. Аманов атындағы №16 орта мектептің оқушылары қатысты.

М. Мақатаев  – қазақтың лирик ақыны, өз заманында лайықты бағасын ала алмаса да, өзінен кейінгілер үшін мәртебесі биік ақиық ақын.  Ақын өлеңдеріне 100 – ден астам әндер жазылған. Бұл әндер бүгінде барша жұрттың жүрегінен берік орын алып, қуанышы мен қайғысын бөлісетін айнымас жан серігіне айналып үлгерген. Кеш барысында ақынның сөзіне жазылған «Шашыңнан иіскейін», «Нені аңсаймын» ,«Қазағым-ай», «Бақыт деген», «Есіңе мені алғайсың»  т.б. әндері орындалды. Сонымен қатар, кешке қатысушылар ақын өлеңдерін нақышына келтіріп оқып, мәңгілік жасай беретін ақын жырларының жасампаздығын көрсетті.

М. Төлебаев атындағы музыкалық училище студенттерінің орындауында  ақынның «Аққулар ұйықтағанда» поэмасынан үзінді қойылып, алтын қорда  сақталған Мұқаңның өз даусымен айтқан өлеңдері тыңдалды.  Кеш барысында «Мұқағали – мәңгілік ғұмыр» атты тақырыпта кітап көрмесі ұйымдастырылып, ақын өмірбаны мен шығармашылығына арналған бейне-презентация көрсетілді.