Бақыттымыз бірге!: сайыс

Бүгінде өнегелі отбасылық құндылықтарды насихаттайтын шараларды өткізу дәстүрге айналып отыр. Осы мерекеге орай 21 қыркүйек күні «Жанұя орталығы» ҚҚ Абай атындағы кітапханамен бірге Семей қаласы әкімиятының қолдауымен әлеуметтік қорғау мекемелерінің отбасылары арасында сайыс өткізді. Сайысқа қатысуға Семей қаласының №1 арнайы әлеуметтік қызметтер көрсету орталығы Пірімбетовтер отбасын, Семей қаласының №3 арнайы әлеуметтік қызметтер көрсету орталығы Өміртаевтар отбасын, арнайы әлеуметтік қызметтер көрсету орталығы Бектеновтар отбасын, Семей қаласының №2 арнайы әлеуметтік қызметтер көрсету орталығы Акрамовтар отбасын ұсынды. Әр отбасы өздерін таныстырып, шағын театрландырылған көріністер көрсетіп бақ сынасты. Сайыс қорытындысы бойынша Өміртаевтар отбасы «Ең креативті отбасы» номинациясына ие болды. Үшінші орынды Акрамовтар отбасы, екінші орынды Пірімбетовтар отбасы иеленсе, сайыстың жеңімпазы болып Бектеновтар отбасы танылды. Сайысқа Семей аймақтық мемлекеттік мекеме қызметкерлері кәсіподағының комитеті (кілем), «Жанұя орталығы» ҚҚ (кір жуғыш машина, мұздатқыш), ЖК Сағатбеков ЖФ «Дизайн мебель» (телевизор) демеушілік жасап, бағалы сый-сияпаттарын ұсынды. «Бақыттымыз бірге» негізгі сайысымен қатар 18 отбасы қатысқан «Бақытты отбасы фотосуреттерде» фото байқауы қорытындыланды. Үздік жұмыстар бағалы сыйлықтарға ие болды. Фото байқауға «Жанұя орталығы»ҚҚ, Жолаушылар көлігі және автомобиль жолдары бөлімі, Семей қалалық мәслихаты, кәсіпкерлер Байбеков Н.М., Бордаткенов А.Т. демеушілік етті. Байқау жанкүйерлердің белсенді қолдауымен тату әрі шығармашылық қалыпта өткізілді.