Біздің байланыс телефонымыз: 8 (7222) 52 04 94 · semeybib@yandex.kz
Жаңалықтар
Қыр 17

Абайтану мәселелері және Қайым Мұхамедханұлы: тікелей эфир

17 қыркүйек күні Абай кітапханасының инстаграм желісіндегі парақшасында ф.ғ.к., Шәкәрім университетінің оқытушысы Смағұлова Ақмарал Төлеуғазыкызымен «Абай және Қайым әлемі» тақырыбында тікелей эфир өтті. Тікелей эфир барысында Қайым Мұхамедхановтың Абайтану ғылымына қосқан ерен еңбегі жайлы қомақты ақпарат беріліп, Қайым ағаның ғылымға арнаған елу жыл ғұмырындағы індете зерттеп, иін қандырған да тақырыбы, бәлкім, ең арналы өмірлік мақсаты мен мұраты да Абай поэзиясының қатпарлы құбылыстары болғандығы айтылды. Қайым Мұхамедханов – ұлы ақын өлеңдерін жинаушы, Абай мұрасының жазылуы, басылуы тарихын зерттеген историограф, үш-төрт басылымына түсініктеме жазған библиограф, Абай шығармаларының дұрыс жазылуын жүйелеген текстолог, Абай және оның ақындық дәстүрі хақындағы монографиялық еңбек бітірген теоретик, сол дәуірдегі әдеби нұсқаларды, ел аузындағы жыр-өлеңді, әңгіме-аңызды қағазға түсірген фольклорист екендігі туралы маңызды ақпараттарымен бөлісті.
Ақынның 1909 жылы басылып шыққан алғашқы өлеңдер жинағынан бастап, 1921 ж., 1922ж., 1933ж., 1948 және 1954 жылдардағы жарияланған өлеңдері тым асығыс, тым үстірт жасалғандықтан берілген түсініктерде қайшылық, қателіктер көп кездесетіндігін де айтып өтті Ақмарал Төлеуғазыкызы. Абайды зерттеу мәселесін биік ғылыми дәрежеге көтере отырып, ол кезде Қазақстанда полиграфия базасының болмауы, баспасөз мамандарының жоқтығы, Абайдың алғашқы жинақтарының сапалы болып шығуын қамтамасыз ете алмағандығы туралы ақпараттар берді.
Эфир барысында қонағымыз өзінің кандидаттық диссертациясын жазу барысында Қайыммен кездесіп, сұхбаттасқаны жайлы да айтып берді. Сөз соңында Қайымтану мәселесі болашақтын еншісінде екендігін айтып, жас ғалымдарды осы іске жұмыла атсалысуға шақырды.