Халық жазушысының мұралары: кең көлемді кітап көрмесі

Биыл Ұлы Отан соғысының ардагері, журналист, Қазақстанның халық жазушысы, мемлекеттік сыйлықтың иегері Әзілхан Нұршайықовтың туғанына 100 жыл толады. Кітапханамыздың оқырманы болған, жерлес жазушымыздың құрметіне, жазушы шығармашылығын пайдаланушыларға жан-жақты таныстыру мақсатында «Халқының Әз-ағасы» атты апталық ұйымдастырылды. Апталық 8 сәуірде «Халық жазушысының мұралары» атты кітап көрмесімен ашылды.

Әзілхан Нұршайықов Семей облысы Жарма ауданында дүниеге келген. Ұлы Отан соғысы басталғанда 19 жастағы Нұршайықов майданға шақырылды. Жазушы Калинин, 2-Балтық, 1, 2-Белорус майдандарындағы ұрыстарға қатысқан. Нұршайықовтың шығармашылық өмірі журналистикамен тығыз байланысты болған. Семей қаласынан шығып тұрған облыстық  «Екпінді» газетінде журналист қызметін атқарған. Жазушының осындай өмір жолына арқау болған сүбелі шығармалары көрмеден орын алды. Көрме кітапхана пайдаланушыларын жазушының өмірі мен шығармашылық жолымен таныстырады. Көрмеге жазушының әр жылдары жарық көрген шығармалары қойылды, оның ішінде жазушының романдары, әңгімелері мен публицистикалық зерттеулерінен тұратын Таңдамалы шығармаларының он томдығы, Кеңес Одағының Батыры және Мәскеу үшін шайқастарға қатысқан Бауыржан Момышұлы туралы «Ақиқат пен аңыз» кітабы,  атақты «Махаббат қызық мол жылдар» романы және т.б. сүбелі шығармалары мен аудармалары ұсынылды. Көрмеден орын алған жазушының соғыс жылдарынан кейін Семей қаласында облыстық «Екпінді» газетінде журналистік қызметте жүрген кездерінде аталған газетте жарық көрген мақалалары оқырмандардың қызығушылығын тудырды. Газет беттеріндегі болашақ жазушының мақалалары сол уақыттағы Семей облысының әлеуметтік-экономикалық жағдайынан мол мағлұматтар берген. Халық жазушысының шығармашылығына арналған кең көлемді кітап көрмесі тың материалдармен толықтырылып, жыл соңына дейін жалғасын табады.

Мәңгілік махаббат жыршысы, халқының Әз-ағасы атанған танымал тұлғаның шығармашылығына арналған апталық Әзілхан Нұршайықов көшесіндегі мерекемен, «Махаббат қызық мол жылдар» кітабы бойынша оқырмандар конференциясымен, «Пәктік пен махаббаттың символы» атты әдеби кешпен, «Жазушы мұрасы халық жадында» атты  этнограф-тарихшы, Қазақстан халық ағарту ісінің үздігі Мұхаметқазы Мұхамадиұлының бейнелекциясымен, «Сирек қордағы жазушы қолтаңбасы» атты ретро-басылымдарға шолумен жалғасын табады. Жазушы шығармашылығына қызығушылық танытқан пайдаланушыларды сәуір айының 9-15-і аралығында ұйымдастырылатын шараларға қатысуға шақырамыз.