Шыңғыстаудың өр ұлы: әдеби кездесу кеші

Абай атындағы кітапханада жерлесіміз, жазушы-драматург, Қазақстан Жазушылар одағының мүшесі, «Алаш» сыйлығының лауреаты, Қазақстанның құрметті журналисі, Дәулет Сейсенұлының 75 жас мерейтойына арналған «Шыңғыстаудың өр ұлы» атты әдеби кездесу кеш ұйымдастырылды.
Әдеби кешке қаламгердің замандастары, зиялы қауым өкілдері және Шәкәрім университетінің, М. Әуезов атындағы педагогикалық колледжінің студенттері қатысты. Кеш қонақтарын Д. Сейсенұлының өмір жолы, шығармашылығынан сыр шертетін «Өзге емес, өзім айтам өз жайымды» тақырыбында кең көлемді кітап көрмесі қарсы алды.
Рухани жүздесуде жазушының шығармашылығы таныстырылып, шежіреші, Қазақстан журналистер одағының мүшесі М. Жанболатов, Абай атындағы кітапхананың директоры М. Қарт сөз алып, қаламгерді құттықтап, ізгі тілектерін жеткізді.
Республикалық «Абай» журналының бас редакторы Мұратбек Оспанов жазушыны құттықтай отырып, арнау өлеңін оқыды. Қаламгердің өнегелі өмірінен естеліктер айтылылды.
Аталмыш кеште әнші, Ж. Кәрменовтің кенже шәкірті Қайрат Қабышевтің орындауында әсем әндер орындалды. Кездесу кешін Б.Игілік келісті өткізді.
Іс-шара соңында қаламгер Дәулет Сейсенұлы кітапхана ұжымына, ұйымдастырушыларға зор алғысын білдіріп, шығармашылық жеміс тіледі. Шыңғыстаудың өр ұлына Абай елі атынан алғыс білдіріп, талмас қанат тілейміз!