Қанат сермитін уақыт: әдеби кинозал
Шілденің 15 жұлдызында Абай атындағы кітапханаға «Әдеби кинозал» клубының мүшелері «Қанат сермейтін уақыт» атты поэзиялық қойылымның тұсаукесеріне қала тұрғындарын шақырған болатын.
Бұл – жай ғана қойылым емес, желісі поэзияға негізделген қойылым. Аталған қойылымның режиссері Инна Семененко Күміс ғасырдың һәм 1960-70 жылдардағы ақындардың өлеңдерін қолдана отырып, адам болмысына тән балалық шақ, жастық шақ, махаббат, поэзия, даналық һәм шексіздік сынды күйі мен өмір жолдарын тап басып көрсетті. Поэзия болмыстың бір күйінен келесі күйіне ауысып отырды, әрі поэтикалық авторлық пен сөздің біртұтастығын аңғартқандай сезім қалдырды. Дегенмен, бұл ретте қойылым үстінде Б. Пастернак, М. Цветаева, А. Ахматова, Н. Гумилев, В. Маяковский, В. Брюсов, Н. Рубцов, Д. Самойлов, С. Маршак, Р. Рождественский, Р. Казакова, И. Бродский, А. Кушнер сыңайлы әр қилы ақындардың өлеңдері пайдаланылғанын атап өту қажет. ХІХ-ХХ ғасырлардағы поэзияны қойылымға қатысқан жастар заманға сай жырлады, әрі отырған көрермен жастардың рухына жақын болды деп ойлаймыз. Жас әртістер әркім өзінің орнын таба алатын болмыстың жалпы күйі мен адамның ішкі күйін жеткізе алды. Поэзия – уақыттың рухын сезінуге көмектеседі. Осынау бір қойылым көрермен қауымды шынайылығымен баурап алғаны сонша, шараның соңында жиналған көрермендердің бірі қалмай ду шапалақ соқты. Қойылымның актерлік құрамы негізінен шығармашылық арқылы өздерінің шығармашылық қабілеттерін ұштап жүрген кәсіби дайындығы жоқ жастардан құралатынын ерекше атап өткіміз келеді. Ал алға бастаушы (жетекші) ақынның рөлін сомдаған Леонид Федоровичтің жасы бүгінде алпыс тоғызда. Міне, осылайша поэзия екі ұрпақтың басын қосты.
Бұл шарада орта және егде жастағы тұрғындардың ғана емес, ең қуантарлығы – жастардың да қарасы көп болды. Семейліктер жаздың осы күндері белсенділік танытқандары соншалық, сахнада ине шаншар жер де қалмады.
Абай атындағы кітапхана мен «Четвертая стена», «Glueck» атты театралды студиялардың арасындағы ортақ жоба жастардың поэзияға, кітап оқуға деген ықыласын арттырады деп үміттенеміз.