Іздеу – естелік: халықаралық кездесу
2 сәуір күні Абай кітапханасының «Парасат жолы» орталығында Қазақстан мен Ресейдің ынтымақтастығы аясында Ұлы Отан соғысы жылдарында хабарсыз кеткен жауынгерлерді табуға бағытталған іздестіру топтарының қызметі туралы халықаралық кездесу өтті.
Кездесуді Семей қаласының әкімдігі мен соғыс, еңбек және қарулы күштер ардагерлерінің кеңесі ұйымдастырды. Шараны Семей қаласының соғыс, еңбек және қарулы күштер ардагерлері кеңесінің төрағасы Доғалақов Амантай Айтмұрзаұлы жүргізді. Аталмыш кездесуге Ресей Федерациясының Ямало-Ненецк автономиялық округінің іздеу бөлімшелерінің өкілдері, Семей қаласының ардагерлері, Ұлы Отан соғысы жылдарында хабарсыз кеткен жауынгерлердің ұрпақтары, қаланың жоғары оқу орындары мен колледждерінің студенттері қатысты.
Іс-шараның басты мақсаты: жастарды әскери-патриоттыққа тәрбиелеу, Ұлы Отан соғысы туралы естеліктерді және ұрпақтар сабақтастығын сақтау және арттыру.
«Ямал плацдармы» коммерциялық емес іздеу отряды серіктестігінің төрағасы А.Е. Гуничев Ямало-Ненецк автономиялық округінің іздеу отрядтарының соғыс кезінде із-түзсіз кеткен сарбаздар Шығыс Қазақстан облысы Жаңасемей ауданының тумасы Мұхтар Қайшатаев пен Ямало-Ненецк автономиялық округі, Тамбей ауылының тумасы Иван Яптиктің ұрпақтарын іздестіру жұмыстары туралы айтты, аты аталған сарбаздар екінші Белоруссия майданының 46-атқыштар дивизиясының 340 атқыштар полкінде соғысқан, екеуі де 1945 жылы қайтыс болған.
Ямало-Ненецк автономиялық округінің іздеу тобының Халықаралық қатынастар бөлімінің Халықаралық қызметтер департаменті басшысының орынбасары Д. А. Голиков кездесуге қатысушыларды «Біздің бостандығымыз – біздің жеңісіміз» жобасының жұмысымен таныстырды, Оның мақсаты әскери шайқастар болған жерлерді аралау, қаза тапқан жауынгерлерге қойылған мемориалдық ескерткіштер мен обелискілерді қалпына келтіру.
Алматы қ. «Atamnyn Amanaty» ҚБ төрағасы Р.М. Машанова бұл елімізде соғыс кезінде қаза тапқан және хабарсыз кеткен жауынгерлердің жерленген орындарын іздестіруге арналған архивтік-іздестіру жұмыстарымен айналысатын жалғыз ұйым екендігін атап өтті. Ол сондай-ақ қоғамдық бірлестік құрылғаннан бастап (2019 ж.) 800-ге жуық қаза тапқан қазақстандық жауынгерлердің табылғанын баса айтты және соғыс кезінде қаза тапқан жауынгерлерді мәңгі есте қалдыру бойынша бүкілресейлік «Поисковое движение России» қоғамдық қозғалыспен бірлескен іздестіру жұмыстары туралы да айтты.
Іздестіру топтарының бірлескен жұмысы, қарулас жолдастарының немерелерінің кездесуі – Қазақстан мен Ресей халықтарының бірлігінің үлгісі.
