Еңбек пен ерліктің, сезім мен сенімнің жаршысы: әдеби кеш

Абай атындағы әмбебап кітапхана 15 сәуір күні Қазақстанның халық жазушысы, Әзілхан Нұршайықовтың 100 жылдық мерейтойына арналған «Халқының Әз-ағасы» атты   апталықты қорытындылады. Өмірдің сан алуан қиындығын бастан кешсе де, өзі таңдаған сара жолдан таймай, өмірінің ақырғы күндеріне дейін адамзатқа рухани азық сыйлап, ұрпақты ізеттілік пен сүйіспеншілікке баулып өткен Әз ағаның шығармаларымен сусындату –апталықтың басты мақсаты болды.

Апталықтың соңғы күні «Еңбек пен ерліктің, сезім мен сенімнің жаршысы» тақырыбында ұйымдастырылған әдеби кешке қатысушы қонақтарды жазушы мұраларынан жасақталған кең көлемді кітап көрмесі қарсы алды. Кешті жүргізуші жазушының өмірі мен шығармашылығына тоқталып, 2007 жылы өзі оқырманы болған осы кітапханада қонақта болып, оқырмандармен кездескенін айтып, кездесу барысындағы естеліктерімен бөлісті.

Кеш қонағы, этнограф-ғалым, тарихшы Alikhan Bokeikhan University профессоры Мұхаметқазы Мұхамедиұлы Әзілхан Нұршайықов шығармаларының танымдық мәнімен бірге ұлттық әдебиет пен мәдениетті, ана тілін өркендетудегі рөлі зор болғанын, сонымен қатар  Әз-ағамен талай дастархандас болып,  көкірегіне түйген сырларымен бөліскені жайлы әңгімеледі. Жазушының «Ақиқат пен аңыз», «Махаббат қызық мол жылдар»  шығармаларының жазылу тарихы мен тәрбиелік мәні туралы баяндады. Алғашқы тырнақалды туындысын поэзиядан бастағанын тілге тиек етті. Шараға Семей медицина университетінің студенттері мен М.Әуезов атындағы педагогикалық колледжінің студенттері қатысып, өздерін толғандырған сұрақтарын қойды.

М.Әуезов атындағы педагогикалық колледжінің студенттері «Махаббат қызық мол жылдар» шығармасының желісі бойынша қойылым қойып, романдағы Меңтай мен Ерболдың рөлін шынайы сомдап шықты. Қойылым жарты сағатқа арналғанмен, сюжеті романдағы негізгі оқиғалармен үндестік тапты. Қойылым көрермендердің жүрегіне жетіп, ыстық ықыласпен қабылдады. Жас ақын Жақсылық Әскербек өзінің өлеңін оқып, қатысушы жастарға алғысын білдірді.

Ә.Қашаубаев атындағы филармонияның әншісі Әліби Қаниев пен  ақын, кітапхана маманы Бауыржан Игілік «Сағыныш», «Махаббат әні» өлеңдерін гитара мен баянның сүйемелдеуімен айтып, Тарихи өлкетану мұражайының қызметкері, ақын Тобықбаев Тілек «Гүлайым», кітапхана маманы Қуандық Кенжебек «Жамалым» әндерін домбырамен нақышына келтіре орындап кештің сәнін келтірді.

Біздің әдебиетіміз бен мәдениетіміздің мол қазынасы, бүгінде аты аңызға айналған Әзілхан ағаның шығармалары ары қарай да насихатталып,  кітапханамызда шаралар легі жалғасын таппақ.