Абай. Шығармалары: өлеңдер, аудармалар, қара сөздер /Құраст.: А. Смағұлова. – Астана: Фолиант, 2023. – 416 б. – («Абай жолы» кітапханасы)

Абай мұрасы – әрбір адамзат баласы үшін өсиет – өнегенің таптырмас үлгісі. Барша адамзат баласын бауырындай көруге үндеген Абай насихаты – бүкіл әлемге ортақ қазына. Қазақтың ұлы данышпаны Абайдың адам болу іліміндегі гуманистік ойлары – қай заманда, қай қоғамда болмасын бүкіл адамзатқа ортақ құндылық. Ұлы ақынның  «Адамзаттың бәрін сүй, бауырым» деген ұлағатты сөзі гуманизмді, жер бетіндегі татулық пен тұрақтылықты, достық пен бауырмалдықты насихаттайды. Кітапқа Абай Құнанбайұлының өлеңдері, аудармалары мен қара сөздері енгізілді. Кітап ұлт руханиятына ынтазар жалпы көпшілік оқырман қауымға, білім алушыларға  арналған.

Шәкәрім. Шығармалары: Репринттік басылымы /Құраст.: А.Т. Смағұлова. – Астана: Фолиант, 2023.- 328 б. – («Абай жолы» кітапханасы)

Шаһкәрім (Шәкәрім) Құдайбердіұлы – қазақ әдебиеті тарихындағы аса ірі тұлға. Ұсынылып отырған кітапқа Шәкәрім Құдайбердіұлының  1912-1924 жылдары Семейде жарық көрген «Қазақ айнасы», «Еңлік – Кебек», «Қалқаман – Мамыр», «Дубровский әңгімесі» кітаптарының репринттік басылымы енгізілді. Ешқандай өзгеріссіз, қосымшасыз, түсініктерсіз репринттік  басылым үлгісінде көпшілік назарына  ұсынылып отыр. Бұл кітапта қазақта мұнан 190 жыл бұрын болып өткен бір оқиғаны қисса қылып өлеңмен жазылған. Шәкәрімнің дүниетанымы, ойшылдығы, діни көзқарастары прозалық туындыларында адамның өмірімен, еңбегі, тағдыры, талап, тілектері терең танылады. Кітап  зерттеушілерге, мәтінтанушыларға, ғылыми қызметкерлерге және қалың оқырман қауымға арналған.

Жыр жауһарлары. Бірінші кітап: Өлеңдер мен толғаулар, дастандар мен поэмалар /Құраст.: М. Қарт. – Астана: Фолиант,2023. – 304 б. – («Абай жолы» кітапханасы)

«Жыр жауһарлары» таңдамалы жыр жинағына жазба әдебиетінің жауһарлары еніп отыр. Жыраулар поэзияының ірі өкілі Ақтамберді Сарыұлы мен Дулат Бабатайұлынан  бастап, қазақ жазба әдебиеті ақындарының, Абайдың ақын шәкірттерінің шығармалары еніп отыр. Жауынгерлік поэзияның үздік үлгілері «Күлдір – күлдір кісінетіп», «От басар орны отаудай» толғаулары мен тағы басқа өлеңдері қазақ поэзиясының алтын қорына қосылған. Кітап барша оқырман қауымға арналған.

Білгенге маржан. Екінші том: Таңдаулы материалдар /Құраст.: М. Оспанов. – Астана: Фолиант, 2023. – 400 б. – («Абай жолы» кітапханасы)

Кітаптың екінші томына республикалық «Абай» журналының 1992 жылғы 3- санында жарық көрген, яғни ұлы ақынның көзі тірісінде 1897 жылы «Дала уәлаяты» газетінде шыққан өлеңдерінен бастап, күні бүгінге дейін тікелей Абай дүниетанымына, шығармашылығына, мерекелік – ұлықтау күндеріне арналған материалдар топтастырылған. Барлық ұсынылған мақалалар 1992  жылы қайта жалғасын тапқан журналдағы айдарлар арқылы оқырманға жол тартады. Еңбек ғылыми қызметкерлерге, ізденуші – магистранттарға, мектеп мұғалімдері мен студенттерге және әдебиетке құштар қалың оқырманға арналған.

Мұсаұлы Ы. Аға сұлтан: Роман. – Астана: Фолинт, 2023. – 368 б. – («Абай жолы» кітапханасы)

Бұл кітапқа автордың «Аға сұлтан» романы және Абайтану тақырыбындағы зерттеу мақалалары енген. Романда он тоғызыншы ғасырдың орта шенінде Қарқаралы дуанында болған оқиғалар суреттеледі. Аға сұлтан – Абайдың әкесі Құнанбай қажы, романда оның отарлану зардабынан ел рухын күйреуден сақтау үшін уезд орталығы Қарқаралыда мешіт салдыруының мәні мен астары егжей – тегжейлі ашылады. Сондай-ақ Ырысхан Мұсаұлының өнегелі өмір жолын көрсететін мақалалар мен естелік – эсселер топтастырылған.

 Айтұлы Н. Есіл де есіл, есіл күн …: Өлеңдер, поэмалар. – Астана: Фолиант, 2023. – 368 б. – («Абай жолы» кітапханасы)

Қазақтың көрнекті ақыны, Мемлекеттік сыйлықтың лауреаты, Қазақстанның еңбек сіңірген қайраткері, «Парасат», «ІІІ дәрежелі Барыс» ордендерінің иегері Несіпбек Айтұлының бұл поэзиялық  кітабына соңғы жылдары жазылған жаңа өлеңдері мен поэмалары енгізіліп отыр. Несіпбек Айтұлы – ән – өлең жанрына да ерекше үлес қосқан ақын. Оның «Ән домбыра», «Сарыарқа», «Дәурен-ай», «Арман», «Дариға, дәурен»,«Қазақтай ел қайда» секілді көптеген туындылары халықтың сүйіп айтатын таңдамалы  әніне айналған. Несіпбек Айтұлы –  өз заманын жеріне жеткізе жырлап, бүгінгінің жырауы атанған, Әлішер Науаидай әлем классиктерін туған тілімізге аударған кесек талант. Кітап әдебиет сүйер қауымға және қалың оқырманға арналған.

Абай Құнанбайұлы және қазіргі қазақстандық қоғамның басымдықтары. Т.3: Әубәкір Ж. Абай және ұлттық болмыс /Жоба жетекшісі Е. Сыдықов. – Алматы: Алгорифм, 2023. – 222 б.

Ұсынылып отырған кітапқа  филология ғылымдарының кандидаты, доцент Жандос Мағазбекұлы Әубәкірдің «Абай және ұлттық болмыс» атты ғылыми-зерттеу еңбегінде ақын мұрасындағы адами қасиеттерге, рухани құндылықтарға кеңінен тоқталған. Ұлы ақын айтатын бес асыл іс пен бес дұшпан бүгінгі қоғамда да өзектілігі жойылмағандығы негізге алынған. Ақынның асыл ойларын қазіргі қоғам дамуымен сабақтастыра қарау – ғылыми-танымдық еңбектің басты ұстанымы болған. Кітап түрлі сала мамандары мен білім алушыларға, жалпы оқырман қауымға арналған.

Абайдың «Толық адам» ілімі және қоғамдық сананы жаңғырту. Том 4: Ысқақұлы Д. Абай – дала данышпаны: Ғылыми- зерттеу еңбек. – Алматы: «Алгорифм», 2023.- 334 б.

«Абайдың «Толық адам» ілімі және қоғамдық сананы жаңғырту» сериясының – 4 –томы ретінде ұсынылып отырған филология ғылымдарының докторы, профессор Дандай Ысқақұлының «Абай – дала данышпаны» атты ғылыми – зерттеу еңбегінде қазақтың ұлы ақыны, данагөйі Абай Құнанбайұлының шығармашылығына бүгінгі күн биігінен көз жіберіліп, оның өміршеңдік өркендеріне назар аударылады. Адамзат баласының ғасырлар бойғы дамуы барысында жинақтаған білім-ғылым жетістіктеріне, имандылық негіздеріне, адамның қалыпты жолмен жетілуінің табиғи заңдылықтарына сүйене отырып, «толық адам» тұғырнамасын жасайды. Бақытты қоғам орнатудың бірден – бір шарты бірлік дей келіп, оған қол жеткізетін адам ойының, сөзінің, ісінің бір арнадан шығып жатуына көңіл аударады.  Бұл еңбек жоғары оқу орындарының студенттеріне, жалпы ұлтын сүйген қалың оқырманға арналған.

Абай шығармаларының тілі мен қазіргі тіл білімінің өзекті мәселелері. Том 5: Салқынбай А. Абайдың даналық әлемі: Ғылыми – зерттеу еңбегі. – Алматы: «Алгорифм», 2023. – 334 б.

«Абай шығармаларының тілі мен қазіргі тіл білімінің өзекті мәселелері» сериясының 5-томы ретінде ұсынылып отырған филология ғылымдарының докторы, профессор Анар Бекмырзақызы Салқынбайдың «Абайдың даналық әлемі» атты зерттеулері кемеңгер ақынның ұлттың рухани болмысында бірегейлік пен таным тұтастығын қалыптастырудағы рөлін, шығармашылығындағы рухани құндылықтардың негізділігі, эстетикалық талғам мен үйлесімді, адами құндылық концепциясының қағидалары лингвофилософиялық және лингвомәдени бағытта зерделеуге арналған. Зерттеу еңбек мәдениеті мен әдебиетін, тілі мен ділін ұлттық құндылық ретінде танитын қалың оқырман қауымға, ғалымдарға, ғылым мен білім жолындағы ізденушілерге арналған.

Абай мұрасы және қазақстандық қоғамның мәдени құндылықтары. Том 10: Жұртбай Т. ….Бір кемел (Абайдың ішкі (батин) әлемі: әдеби – салыстырмалы рисала) /Жоба жетекшісі Е. Сыдықов. – Алматы: Алгорифм, 2023. – 380 б.

Н. Гумилев атындағы Еуразия ұлттық университеті жанындағы «Абай академиясы» Ғылыми Зерттеу Институтының зерттеу жұмыстарын белгілі ғалымдар мен абайтанушылар дайындады. Авторлар қоғамның, ғылымның, әдебиеттің, тілдің өзекті мәселелерін Абайдың дүниетанымы мен мұрасы арқылы қарастырды. Ұсынылып отырған «Абай мұрасы және қазақстандық қоғамның мәдени құндылықтары» сериясының 10- томы филология ғылымдарының докторы, профессор Жұртбай Тұрсын Құдагелдіұлының «…Бір кемел» Абайдың ішкі әлемі: әдеби – салыстырмалы рисала» зерттеу еңбегі Абайдың сыртқы әлеміне арналған. Абайдың жан мен тән туралы философиялық-психологиялық ілімді қамтитын пікірлері арғы – бергі оқымыстылардың ойларымен бүгінгі зәррелік – кванттық ілім жетістігінің нәтижелерін салыстырыла отырып пайымдаулар жасалған. Кітап абайтанушылар мен қоғамтану ғылымы саласының мамандарына және жалпы көпшілік қауымға арналған.