Қазақтың ұлы перзенті: әдеби танысу

7 маусым күні Абай атындағы әмбебап кітапхананың балалар әдебиеті бөлімінде «Бір ел – бір кітап» республикалық акциясы аясында ақын, ағартушы Сұлтанмахмұт Торайғыровтың шығармашылығы бойынша «Қазақтың ұлы перзенті» атты әдеби танысу сағаты өткізілді.

Шара барысында балаларға акцияның шығу тарихы, ақынның өмірі мен шығармашылығы туралы айтылып, «Ақындардың сұлтаны» атты бейнефильм ұсынылды. Ақын шығармашылығында елеулі орын алатын «Қамар сұлу, «Кім жазықты» романдарымен, «Танысу», «Адасқан өмір», «Кедей», «Айтыс» поэмаларымен таныстырылып, оқуға, білімге деген құштарлықтарын арттыратын өлеңдерінен үзінділер оқылды, білімдерін жетілдіру мақсатында мақал-мәтелдер жалғасын тауып, балалар өздерінің ойлау қабілеттерін көрсете білді.
№39 орта мектептің 7 «ә» сынып оқушысы Базанова Аружанның орындауындағы «Алтын бесік» әнін қатысушылар зор қошеметпен қабылдады, ал №35 орта мектептің 6 «б» сынып оқушысы Жакина Мадина ақынның шығармасынан үзінді оқудан ерекшеленіп, көрермен қошеметіне ие болды.

Ақынның өмірі мен шығармашылығынан сыр шертетін «Қазақтың ұлы перзенті» атты кітап көрмесіне шолу жасалып, шараға үлесін қосқан өнерпаз балалар алғыс хаттармен марапатталды. Аталмыш шара патриоттық рух беретін ақынның «Алаш ұраны» әнінмен аяқталды.