Бұл ән бұрынғы әннен өзгерек: танымдық сағат

Ғұлама ақын Шәкәрім Құдайбердіұлының 160 жылдығына орай 4 сәуір күні Семей қаласының Шәкәрім атындағы мемлекеттік университетінің Жоғарғы агротехникалық колледжімен бірге «Бұл ән бұрынғы әннен өзгерек» атты танымдық сағат өткізілді.

Шараның арнайы қонағы ретінде Ә.Қашаубаев атындағы филормонияның әншісі, ҚР Мәдениет саласының үздігі Берік Омаров қатысып, Шәкәрім әндерінің маңыздылығы, құрылысы, орындалу мәнері туралы және Шәкәрімнің әндерін зерттеушілер мен орындаушылар жайында маңызды ақпарат берді. Абай Шәкәрімнің өлеңге бейім екенін білген соң өзінің тәрбиесіне алған. Шәкәрім өлең шығаруда Абаймен көп ақылдасқан. Әнші Б.Омаров Шәкәрімнің 11 буынға құралған «Бұл ән бұрынғы әннен өзгерек» әнінің орындалуының өте жеңіл, бірақ сөздерінің философиясының өте терең, маңызды екендігін тілге тиек етті. Шәкәрім әндерін орындауда салдыр-гүлдір қағыстың өлең сөзінің қадірін кетіретіндігін айтып, әндердің орындалу мәнерін жастарға әңгімеледі. Шара барысында ғұлама ақынның «Бұл ән бұрынғы әннен өзгерек», «Анадан алғаш туғанда» өлеңдерін орындап, Шәкәрім әндерін орындауға қызығушылық танытып жүрген жастарға әннің орындалу техникасын үйретті.

Шараға қатысқан студент-жастар ақынның шығармашылығы жайлы қойған сауалдарына тиісті жауаптарын алып, мол ақпаратқа қанық болды.