«Письма с фронта»: бір кітаптың көрмесі

Абай кітапханасында 15 сәуір күні сирек басылымдардың «алтын қорынан» Халық жазушысы, Мемлекеттік сыйлықтың иегері Ә.Нұршайықовтың майданнан жазған хаты енген, 1944 жылы Алматыда «Қазақтың біріккен мемлекеттік баспасынан» жария көрген «Письма с фронта» жауынгерлер хатының жинағының көрмесі өтті.
«Біз жеңеміз, өйткені ісіміз ақ!
Барлық адам баласы бізбенен жақ,
Дүниеге зұлымдық үстем болып,
Шықпақ емес, әділдік жеңуі хақ!..»- деген өлеңін облыстық «Екпіндіге» жариялап, 1941 жылы Ұлы Отан соғысына аттанған жауынгер Ә. Нұршайықов 786 күн мен түн жаумен айқаса жүріп, қаламын қолынан тастамаған. 1943 жылдың 6 ақпанында қазақ халқынан майдандағы жауынгерлерге хат келеді. Сол хатқа жауап ретінде сол жылдың 22 наурызында 100 дербес атқыштар бригадасы жауынгерлері атынан «Атамыз Жамбыл ақынға» атты жазылған өлең хат орыс-қазақ тілдерінде «Социалистік Қазақстан» мен «Казахстанская правда» газеттерінде бір күнде жарияланады. Республикалық газеттен көшіріп өлең хатты «Екпінді» газеті де жариялайды.
Келесі жылы өлең хат Б.Момышұлының, Б.Бұлқышевтың, М.Ғабдуллиннің және басқа да майдангерлердің хаттарымен бірге «Письма с фронта» жинағында орыс тіліне В.Копытинаның аудармасымен «Сталин нас ведёт к победе? Письмо воинов-казахов Н-ского соединения Джамбулу»- деген атаумен жария көрген. Хаттың соңында: «По поручению бойцов, командиров и политработников Н-ского соединения: Орденоносец, молодой акын сержант Нуршаихов,.. жауынгерлер аты-жөні жазылып, соңын подполковник Баишев Сақтаған есімімен аяқтаған.
Жалынды, жеңіске жігерлендіретін жырда Семейлік батыр жауынгерлер Буршиев, Әбдірахман, Ерназаров Мырзабай, Сулейменов Ибрагим, Әшкидің ұлы Райымжан есімі аталады.
Майдан даласында «Абай жолы» эпопеясын жауынгер қапшығынан тастамай, өзімен бірге от кешкенін қаламгер естелігінде айтатын. Оқырман үшін қашан да жеңіске жетелейтін биік рухқа толы Ә.Нұршайықов туындылары құнды мұра болмақ.