Мұхтар Әуезов – қазақ әдебиетінің көрнекті классигі: көрме
Ұлы Дала көптеген көрнекті мемлекет қайраткерлерінің, белгілі ақын-жазушылардың, дарынды суретшілер мен саз шеберлерінің туған жері. 2022 жылы аталып өтілетін айтулы мерейтойлардың қатарында қазақтың көрнекті жазушысы, драматургі, қоғам қайраткері, ғалым Мұхтар Омарханұлы Әуезовтің 125 жылдығы да бар. Мерейтойға орай Абай атындағы облыстық кітапханасы 19 мамыр күні «Мұхтар Әуезов – қазақ әдебиетінің көрнекті классигі» тақырыбында қазақтың ұлы жазушысының өмірі мен шығармашылығын таныстыру мақсатында кең көлемді иллюстрацияланған көрме ұйымдастырды.
Көрмемен М.Төлебаев атындағы музыкалық училищесінің, Бизнес және сервис колледжінің, «Қайнар» колледжінің, Д. Калматаева атындағы мемлекеттік медицина коледжінің және Р.Байсеитов атындағы Семей қаржы-экономиколық колледжінің студенттері танысты.
Көрмеге жазушының «Абай жолы» романы, «Таңдамалы заман», «Таңдамалы шығармалары», т.б. туындылары мен Б. Щербаковтың «Жидебайдың жұлдызды даласы», «Неизвестное в наследии Мухтара Ауэзова. Архивные документы», Н.Анастасьевтің «ЖЗЛ. Мұхтар Әуезов», «Шығыс жұлдыздары» энциклопедиялық анықтамалығы, 200 автордың үш мыңға жуық мақаласы мен 500-ден астам иллюстрациялары енгізілген «Мұхтар Әуезов. Энциклопедия», ұлы жазушының қалыптақан ортасы, оның аса бай шығармашылық мұрасы туралы жинақталған материалдар ұсынылды.
Студенттер М.Әуезовтің шығармашылығымен, жазушы өмірінен қызықты деректермен танысып, қаламызда алғаш құрылған «Ярыш» футбол командасында студент Мұхтар ойнағаны жайында ақпарат білді.
Студенттер биыл М.Әуезовтің «Абай жолы» атты ең әйгілі шығармасының бірінші кітабының жарыққа шыққанына 80 жыл толып отырғанын, ол жазушының есімін дүние жүзіне танытқанын білді. Біздің кітапханамыздағы 1945 жылғы жарық көрген Леонид Соболевтің орыс тіліне аударған алғашқы басылымдарының бірі – «Путь Абая» студенттер арасында ерекше қызығушылық тудырды.
Сондай-ақ шара барысында жастар М.Әуезов шығармашылығына қатысты түрлі сұрақтарға жауап беріп, сүйікті шығармалары мен кейіпкерлері туралы әңгімеледі.
