Ырысхан Мұсаұлы «Аға сұлтан» романы: тұсаукесер

25 сәуір күні Абай атындағы кітапханада жерлесіміз, жазушы, Қазақстан Жазушылар одағының мүшесі, Қазақстанға еңбек сіңірген қайраткер, Облыстық «Семей таңы» газеті мен республикалық «Абай» журналының бас редакторы қызметін атқарған Ырысхан Мұсаұлының «Аға сұлтан» романының тұсаукесері болды.
Тұсаукесерге қаламгердің замандастары, зиялы қауым өкілдері қатысып, жазушының өнегелі өмірінен естеліктер айтылды.
Аталмыш кеште әнші, Семей мемлекеттік филармониясының әншісі Жасұлан Тәжиев қазақ әндерін шырқап, көпшілік көңілін көтерсе, шежіреші М.Жанболатұлы Ы.Мұсаұлы туралы естелікпен бөлісіп, ғалым М.Мұхамәдиұлы жазушының еңбегі жайында терең сыр шертті.
Сондай-ақ, Ырысхан Мұсаұлының өмір жолы, шығармашылығынан сыр шертетін «Дархан даланың ұлы тұлғасы» тақырыбында кең көлемді кітап көрмесі жасақталды. Көрмеге жазушының әр жылдарда шыққан еңбектері, мерзімді басылым беттерінде жарық көрген мақалалары және еңбегі үшін алған марапаттары қойылды.
Іс-шара соңында қаламгердің жұбайы Күлғайша Дікенқызы мен немересі Сая Семейхан кітапхана ұжымына, ұйымдастырушыларға зор алғысын білдіріп, шығармашылық жеміс тіледі.