Азалы тарихқа айрықша тағзым: еске алу кеші
Абай атындағы кітапханада 31 мамыр – саяси қуғын-сүргін құрбандарын еске алу күніне арналған «Азалы тарихқа айрықша тағзым» тақырыбында еске алу кеші өткізілді. Кешке қатысушы қонақтарды Алаш арыстарының өмірі мен қоғамдық қызметіне, шығармашылығына арналған «Алаш арыстарының асыл мұралары» тақырыбындағы кең көлемді кітап көрмесі қарсы алды. Сирек басылымдар беттерінде жарық көрген Әлихан Бөкейханның ғылыми еңбектері қатысушылардың басты назарында болды.
Шара саяси қуғын-сүргін құрбандарын 1 минут үнсіздікпен еске алудан басталып, шараны кіріспе сөзбен Семей қалалық ішкі саясат бөлімінің қызметкері Ю.П.Посьмаков ашты. Айрықша тарихи күннің маңызы мен мәні туралы «Алаштану» ғылыми-зерттеу орталығының директоры, ф.ғ.к. Тұрдықұл Шаңбай мен тарихшы-ғалым, профессор Амантай Исиндер сөз алды. Семейдің жас ақындары өздерінің арнау өлеңдерін оқыды.
Шара барысында көрнекті қоғам және мемлекет қайраткері, ұлт-азаттық және Алаш қозғалысының жетекшісі, Алашорда автономиялы үкіметінің төрағасы, публицист, ғалым, аудармашы Әлихан Бөкейхановтың 150 жылдық мерейтойына орай дайындалған «Ұлт көсемі – Әлихан» тақырыбындағы виртуалды кітап көрмесінің тұсаукесері өткізілді.
«Ғалым мұрасы», «Сирек құжаттарда», «Ғұмырнама», «Кітаптар», «Мақалалар», «Қаламгер мақалалары», «Бейнематериалдар», «Сілтемелер» бөлімдерінен тұратын виртуалды көрме ғаламтор пайдаланушыларына кітапхана қорында сақталған Ә.Бөкейханның өмірі мен шығармашылығына, қоғамдық қызметіне арналған басылымдармен, мультимедиялық туындылармен таныстырады. Жалпы көрме мерзімді басылымдар беттерінде жарық көрген 30-ға тарта мақаланың толық мәтінін және Ә.Бөкейханға арналған арнау өлеңдерді, қайраткердің түрлі фотосуреттері мен ол туралы семейлік алаштанушылар мен тарихшылардың бейнежазбаларын ұсынады. Көрме қоры алдағы уақытта үнемі толықтырылып отырады.
«Азалы тарихқа айрықша – тағзым» тақырыбында еске алу кеші барысында М.Төлебаев атындағы музыкалық колледждің оқытушысы С.Сақалов өзінің Алаш арыстарына арнаған «Оян түрік!», «Арыстарым қайдасың?» әндерін орындады. Кеш өнертанушы, ақын Қ.Н.Нұрқасымның «Семей және Алаш» өлеңімен аяқталды. Шараға қаламыздың зиялы қауым өкілдері, мектептер мен колледждердің және ЖОО кітапханашылары қатысты.