Ұлы дала елінің Ұлы ақыны: іс- шаралар тізбегі

Жаңа күнтізбе бойынша бүгін, яғни 23 тамыз Ұлы Абайдың туған күні. Осы айтулы күнді ақын атымен аталатын Абай музейі, Абай атындағы кітапхана, «Абай» журналы, Абайдың қоғамдық қоры бірлесіп өзгеше атап өтуді ұйғарды.

Шаралар циклы Абайдың ескерткішіне гүл қою рәсімінен басталды. Кітапханамызға келген оқырман қауымды Абай мұражайымен бірлесіп жасақтаған «Ұлы дала елінің Ұлы ақыны» атты кең көлемді этнографиялық кітап көрмесі қарсы алды. Көрмеге қойылған ақынның таңдамалы өлеңдер жинағы, дастандары, қара сөздері және абайтанушы ғалымдардың зерттеу еңбектері үлкен сұранысқа ие болды.

Абай қорық мұражайының құнды жәдігерлері пайдаланушылар назарына ұсынылып, пайдаланушылар Абай заманына саяхат жасағандай болды. Көрмеден орын алған ақынның өзі тұтынған заттарының көшірмелері, Абай заманындағы аса шеберлікпен жасалған сусын құюға арналған торсық, ожауымен қымыз тегене, домбыра, қобыз, сиясауыт, шашақбау, керме, басқұрларына көпшілік қауым аса назар аударды.

Шараға қатысушылар Абайдың рухани орталығындағы Ұлы ақынның қолының табы тиген орыс, Батыс Еуропаның классиктерінің үздік шығармаларымен, анықтамалықтармен, мерзімді басылымдармен танысты.

Аталған шаралар тізбегі библиомаршрутпен жалғасын тауып, Абай атындағы кітапхана қызметкерлері қаламыздағы Абай көшесінің бойымен жүретін № 41, 33, 35 бағытты маршруттардың жолаушылары үшін Абайдың өмірі мен шығармашылығы, қоғамдық қызметі туралы ақпарттар берді. «Абайды оқы, таңырқа!» атты ақпараттық беттерді автобус қабырғаларына жапсырып, «Абай және кітапхана», «Абайдың өмірлік досы», «Кітапхананың сирек қоры» тақырыптарында буклеттер, бетбелгілер таратып, викториналық сұрақтар қойды. Дұрыс жауап берген жолаушыларға Абайдың кітаптары сыйға тартылды. Аялдамалардағы қала тұрғындарыда іс-шараға белсене қатысып, қажетті ақпараттар алып, сыйлықтарға ие болды.

Абай шығармашалағын қала тұрғындарына кеңінен насихаттау мақсатында ұйымдастырылған игілікті шара жылда жалғасын таба береді деген сенімдеміз.