Абай мұрасы: онлайн конференция
«Кітапханашылардың Қостанай облыстық қауымдастығы» қоғамдық бірлестігінің ұйымдастыруымен 30 қазан күні «Абай мұрасы» аудандық ғылыми-тәжірибелік конференциясы ұйымдастырылды. Шараға Қостанай ауданы мектептерінің мұғалімдері мен оқушылары, мәдениет саласының қызметкерлері қатысты.
Ұлы Абайдың 175 жылдық мерейтойына орай қостанайлық оқырман қауымға Абай мұралары мен ақынның қайраткерлік тұлғасын көрсететін дереккөздерді жан-жақты таныстыруға арналған шара барысында қостанайлық жас ғалымдар және кітапханамыздың директорының орынбасары Г.М. Аязбаева мен мерзімді басылымдар бөлімінің меңгерушісі Ж.Ә. Манжибаева баяндама жасады. Қонференцияға қатысушылар Абай атындағы кітапхананың сирек басылымдар қорындағы құнды басылымдармен танысты.
«Абай және кітапхана» тақырыбында баяндама жасаған әріптесіміз Абай есімімен тығыз байланысты кітапхананың тарихы туралы баяндап, данышпан ақынның қоғамдық кітапхананың оқырманы болғандығы жөнінде американ жазушысы, публицист Дж. Кеннанның жазған «Сибирь и ссылка» атты документті зерттеу еңбегінің мазмұнына тоқталды. Абайдың өмірбаянын жазған Кәкітай Ысқақұлы және белгілі абайтанушы ғалымдар Әбіш Жиреншин мен Қайым Мұхамедхановтардың зерттеу еңбектерінен тағылымды деректер келтірді.
Ұлы ақынның қайраткерлік тұлғасын танытатын сирек өлкетану басылымдары оқырмандарға қашан да қызықты. Кітапхананың сирек қорындағы ұлы ақынның көзі тірісінде-ақ ол жайлы жазылған дереккөздер: «Памятная книжкалар», «Отчет общества попечения о начальном образовании за 1893/94 год», «Семипалатинские областные ведомости за 1894 год» басылымдары тыңдармандар үшін құнды дереккөздер болды. Кемеңгер ақын Абай Құнанбайұлы және Шәкәрімнің, Мұхтар Әуезовтің атасы Әуез Бердіқожаұлының мал-басы, жан санағынан мол ақпарат берер «Сельскохозяйственный обзор Семипалатинской области за 1914 год» басылымы абайтанушылардың назарын ерекше аудартты.
Әріптестеріміздің баяндамаларынан кейін шара қостанайлық жас ғалымдардың «Абай Кунанбаев и его время», «Хакім Абайдың музыкалық мұрасы», «Абай мұрасы және оның маңыздылығы» тақырыптарындағы мағыналы да мазмұнды баяндамаларымен жалғасты.
Ұлы Абайдың мұрасы мен ақынның қайраткерлік тұлғасынан мол мағлұмат берген конференция өте мазмұнды және тағылымды шара болды.
