Қасым Аманжолов Семей қаласының түлегі: тікелей эфир
Кітапханамызға Қазақстан Республикасының судьялар одағының мүшесі, отставкадағы судья Азбанбаев Марат Ақторғайұлы қазақтың ақыны Қасым Аманжоловтың өмірдерегін зерттеу сапарымен ат басын бұрған болатын. Ізденімпаз жанды кітапханамыздың сирек басылымдарының «алтын қорындағы» XX ғасыр басындағы ұлттық мерзімді басылымдарды, өлкетану қорын зерттей келе ақын жайлы құнды деректер табылғаны қуантты. Жасындай аз ғұмыр кешіп, қазақ әдебиетін тамаша туындыларымен көркейткен Қасым ақын жайлы айтып беруін өтінгенімізге Марат Ақторғайұлы ықыласпен келісті.
Автордың биылғы жылғы республикалық «Заң» журналының №3 санында жария көрген «Мен не жаздым сонша соңға түскендей» мақаласына арқау болған қазақтың қайсар ақыны Қасым Аманжолов өмірінің көпшілікке беймәлім қыры 15 сәуір күні кітапханамыздың Facebook парақшасының тікелей эфир барысында әңгімеленді. Мақала тақырыбы ақынның өз өлең жолдарынан алынған. Ақын жыры арқылы өзі айтқандай қуғын-сүргін көрген, күні бүгінге дейін ақталмаған ұлт зиялылары қатарынан. Тікелей эфир барысында ақын дүниеге келген 1911 жылы туған жері Семей облысы, Қарқаралы уезі, Темірші болысы аталып, Семей өңірі тумасы екенін дәлелдесе, білім іздеп облыс орталығы Семейге аттанған бала Қасымның шыңдалып, тұлға болып қалыптасуына да осы қасиетті мекен әсер еткен, Қасым Аманжолов Семейдің қазақ Жасөпірімдеріне арналған мектебінің (Школа казахских подростков) түлегі екенін тындарман қауым ортасына салды.
