Мұхтардың мұхитынан: тікелей эфир
2022 жылдың 22-ші сәуірінде ШҚО Абай атындағы әмбебап кітапханасы ZOOM платформасында Қазақстан жазушылар одағының, Қазақстан журналистер одағының мүшесі, Қазақстанның КИнЭС рекордтар кітабына енген сөзжұмбақшы, Зайсан ауданының құрметті азаматы Алтыбаев Калибек Қизатұлымен «Мұхтардың мұхитынан» атты тікелей эфир өткізді.
Эфир барысында қонағымыз өзінің балалық шағынан бастап сыр шертіп, жасынан зерек, жаны әдебиетке құрмар болғанын айта келе, қабілетті баланың қағылездігін байқап он екі жасында өзінің ұстазы Құрманғали Егеубаевтың қолына «Абай жолын» табыстап тапсырма бергенін тілге тиек етті. Міне, осыдан Калибек Алтыбаевтың заңғар жазушының шығармашылығына деген қызығушылығы басталғанын аңғардық.
Қонағымыздың айтуы бойынша 1950 жылдың ІІ жартысынан бастап «Қазақстан әйелдері» журналында «кросворд» деген жанр пайда болған. Дала төсінде мал бағып, жанына кітап серік қылып жүрген Қалибек мырзаның сол кезде кросворд шешу тағы бір сүйікті ісіне айналған. Аталмыш журнал беттеріндегі сөзжұмбақ жауаптарын келесі санымен салыстырып жүргенде өзінің осы кросвордты құрастыруға деген ниеті оянған.
Шараның шарықтауына келгенде қонағымыздың жеке тұлғаға неге жекелей сөзжұмбақ құрастырмасқа деген ойы туындап, бала күннен жанына жақын болған Мұхтар Әуезовтің шығармашылығына тұңғыш кросворд жасағанын білдік. Сол сарынмен жеке тұлғаларға арналған сөзжұмбақтар жалғасын тауып, кейін Абай, Шәкәрім, Жамбыл сынды алыптардың алтын қазынасын ақылға салып шешер кросвордқа айналдырыпты.
Желідегі байланыс соңында қонағымыз өзінің сөзжұмбақтағы ұстазы қазақтың тұңғыш сөзжұмбақшысы Талапбек Иманбаев болғанын, сол кісінің ізімен өзі «Қазақ сөзжұмбағының әліппесін» жазғанын айтып өтті. Және өзінің осы әліппе желісінде кросвортды – матаусөз, анаграмманы – сөзденсөз, криптограмманы – сансөз, ребусты – бейнесөз, сканвордты – бағдарсөз деп аударғанын жеткізді. Жалпы сөз қортындысында сөзжұмбақпен айналысу үшін асқан шыдамдылықпен, нақты зейін керектігін айтып, сөзін аяқтады.
