Түркі халықтарының ауыз әдебиеті мен аңыздары: ақпараттық сағат

2022 жылдың қараша айында Өзбекстанның ежелгі Самарқанд қаласында өткен Түркі мемлекеттері ұйымының саммиті кезінде көне түркі халықтарының мәдени мұрасын зерттеу және сақтау мақсатында 2023 жылды Түркі өркениетін дамыту жылы деп жариялау туралы шешім қабылданды. Осыған орай 11 қаңтар күні Абай атындағы облыстық әмбебап кітапханасында «Түркі халықтарының ауыз әдебиеті мен аңыздары» атты ақпараттық сағат ұйымдастырылды.
Түркі елдері мыңдаған жылдар бойы Шығыс пен Батысты байланыстыратын, әлемдік өркениеттерді жақындастырып, мәдениеттерді байытатын мәдениет пен өркениет орталығы болып табылады.
Ақпараттық сағат аясында түркі тайпаларының шығу тарихы, тұрмыс-тіршілігі, діні, мәдениеті туралы мәліметтер берілді. Өткеннің көптеген тарихи процестерін айғақтайтын ауызша халық шығармашылығына, түркі халықтарының мифтеріне, аңыз-ертегілеріне ерекше көңіл бөлінді. Ежелгі түркі тектес халықтар Аспанға, жерге, күнге, отқа, ата-бабаларға, киелі жануарларға табынған. Түркі халықтарының дүниетанымында қасқыр – рудың тотемі саналған. Аңыздың бұл нұсқасы түркі халықтарының әдебиеті мен қазіргі мәдениетінде ең кең тараған және барлығында дерлік кездеседі, бұл түркі халықтарының шығу тегінің ортақ екенін көрсетеді.
Шараға қатысушылардың бірі, кітапхананың тұрақты оқырманы, Семей медицина университетінің шетелдік студенті Зешан Әли іс-шарадан алған әсерімен, Қазақстандағы өмірі, қазақстандық білім, сондай-ақ туған елі Пәкістан туралы әңгімелерімен бөлісті.
Шараға С. Бизақовтың «Түрік әлемі», А. Ахметовтың «Түбі түркі өркениет», Қ. Аманжоловтың «Түркі халықтарының тарихы», Л. Гумилевтің «Көне түркілер», Н. Нұртазинаның «История тюркской цивилизации», «Истоки тюрков» жинағы, «Казахский фольклор в собрании Г.Н. Потанина» ғылыми жинағы, О. Жанайдаровтың «Легенды древнего Казахстана», т.б. кітаптар қойылған кең көлемді кітап көрмесі ұсынылды.