Тас мүсінге тіл бітірген мүсінші: тұлғаны еске алу кеші суретші Мұратбек Жанболатұлының туғанына 75 жыл: еске алу кеші
Абай атындағы кітапханада ағымдағы жылы 15 ақпанда Шығыс аймағындағы ең алғашқы кәсіпқой мүсінші, ҚР мәдениет қайраткері Мұратбек Жанболатұлының туғанына 75 жыл толуына орай «Тас мүсінге тіл бітірген мүсінші» тақырыбында тұлғаны еске алу кеші ұйымдастырылды.
Еске алу кешіне қатысушы қонақтарды кітапхананың қорында сақталған басылымдар мен мүсінші М.Жанболатовтың шеберханасында сақталған туындыларынан жасақталған «Мүсін өнерінің майталманы» тақырыбындағы экспозицияланған басылымдар көрмесі қарсы алды.
Жастардың бойына патриоттық сезім ұялататын және парасаттылық пен азаматтыққа, ұлтжандылыққа толы туындыларын жастар санасына сіңіруге ерекше серпін беретін аталмыш шараға Мұратбек Жанболатұлының балалары, туыстары, замандастары, шығармашылық қауым өкілдері қатысты.
Тұлғаны еске алу кешін Абай облысы мәдениет, тілдерді дамыту және архив ісі басқармасының басшысы А.Ибраев кіріспе сөзбен ашты.
Мүсінші М.Жанболатовпен әріптес болған Семей қаласының Шәкәрім атындағы университетінің ұстаздары, Қазақстан Республикасы Суретшілер одағының және дизайнерлер одағының мүшелері, Т.Жуванышев, М.Мырзаканов, өнертанушы, алаштанушы Қ.Нұрқасым, өлкетанушы, суретші, мүсінші О.Бекбаев, Халықаралық “Қазақ тілі” қоғамының облыстық филиалының төрағасы О.Шәріпбаев, республикалық «Абай» қорының президенті О.Кәрріпжанов, Өртке қарсы қызмет көрсету мекемесінің ардагері, запастағы полковник А.Рыков және т.б. зиялы қауым өкілдері қатысып, қатысушы қонақтарға мүсіншінің шығармашылығы және өнегелі өмірі жайында мол ақпарат берді. Мұратбек Жанболатұлының есімі еліміздің өнерсүйер қауымына жақсы таныс екендігін, оның қылқаламынан шыққан әсем графикалық мүсіндері туралы ой қозғады. Шәкәрім тұлғасын сомдағандығы, Ауған соғысында қаза тапқан жауынгерлерге арналған ескерткіш тақтаның, Қарауыл ауылындағы «Үндестік» тақырыбымен жасалған Гете, Лермонтов, Абай атамыздың қоладан құйылған барельефтері қойылған монументтік тақталардың авторы болғандығын мақтанышпен айтып өтті. Мүсіншінің соңғы жасаған туындысы – Халық Қаһарманы Қайрат Рысқұлбековке арналған ескерткішінің ерекшеліктеріне тоқталды.
Мүсіншінің туған ағасы, өлкетанушы, этнограф Молдабек Жанболатұлы өзінің інісі Мұратбектің өміржолына тоқталып, естеліктермен бөлісті.
М.Жанболатовтың мерейтойына арналған тұлғаны еске алу кеші шараға қатысқан Шәкәрім атындағы университеттің гуманитарлы-экономика факультетінің музыка және өнер кафедрасы студенттері үшін маңызды да тағлымы мол шара болды. Шараға жиналған зиялы қауым мүсінші М.Жанболатовтың жеке музей үйін ашу керектігін, жасаған ескерткіштеріне автордың есімінің жазылуы қажет денген ұсыныстарын айтып тарасты.
