Николай Коншин – зерттеуші, Қазақстандағы мәдени мекемелердің негізі қалаушы: халықаралық ғылыми-тәжірибелік онлайн конференция
20 сәуірде Абай атындағы облыстық кітапхана Мәскеу қаласы Ресей мемлекеттік кітапханасы ұйымдастырған «Румянцев оқулары – 2023» халықаралық ғылыми-тәжірибелік онлайн-конференцияға қатысты.
Шараға Ресей Федерациясының, Тәжікстанның, Өзбекстанның, Әзірбайжанның, Беларусь Республикасының, Молдованың және Қазақстанның кітапханалары, мұрағаттары, мұражайлары, ғылыми-зерттеу институттары, баспаларының мамандары қатысты.
Халықаралық ғылыми-тәжірибелік конференцияның мақсаты – дүниежүзілік мәдени мұраны сақтау және зерттеу мәселелеріне, сондай-ақ қазіргі тарихи кезеңдегі кітапханалардың жұмыс істеу мәселелеріне назар аудару, дамудың перспективалық жолдарын іздеу, мәдениет, білім және ғылым институттары арасындағы мәдениетаралық өзара іс-қимыл мен ынтымақтастықты кеңейту.
Абай кітапханасының маманы Мусакиева Айгүл «Николай Коншин –зерттеуші, Қазақстандағы мәдени мекемелердің негізін қалаушы» атты баяндама жасады. Баяндама барысында кітапхана қызметкері қатысушыларды Н.Коншиннің өмірбаянымен, кітапхананың сирек қорында сақталған өлкетанушының зерттеу еңбектерімен, Семей қаласының Қазіргі Заман Тарихын Құжаттандыру Орталығы басып шығарған Н.Коншиннің еңбектер жинағымен, «Абайдың» рухани орталығында сақталған XVIII-XX ғасырдағы мерзімді басылым материалдарымен таныстырды. Баяндама барысында Н.Коншиннің Семейде өмір сүрген кезеңіне ерекше мән беріліп, оның осы қалада жазылған өлкетануға байланысты еңбектері: «Очерк экономического быта киргиз Семипалатинской области», «О памятниках старины Семипалатинской области», «Заметка об одном киргизском джуте» және т.б. туралы мағлұмат берілді. Н.Коншин географиялық қоғамды, көпшілік кітапхананы құруға белсене ат салысып, қаладағы мұрағат мекемесінің басшысы болғаны тілге тиек етілді. Сондай-ақ, қатысушылар назарына Николай Коншиннің жеке мұрағатындағы құжаттары, хаттары мен фотосуреттері бейнеленген бейнеролик ұсынылды.
Конференцияға қатысушылар өз тәжірибелерімен алмасып, кітапхана ісі мен кітаптану теориясы жөніндегі мәселелерімен бөлісті. Оның негізгі бағыттарының қатарында: кітапхана ісінің тарихы, кітап сақтау қоймаларының әмбебап және мамандандырылған қорларын ашу, кітапхана ісін дамытудың басымдықтары мен перспективалары, қазіргі кітапханалардың көп қырлы қызметі болды.
