Жазушы Төлен Әбдіктің шығармашылығы: әдеби-театрландырылған кеш

Балалар әдебиеттері бөлімінің қызметкерлері жас ұрпақтың ұлттық әдебиетті оқуға деген қызығушылықтарын арттыру мақсатында, 2023 жылы «Бір ел – бір кітап» республикалық акция аясында оқуға ұсынылған қазақ жазушысы, драматург, қоғам қайраткері Төлен Әбдіктің шығармалары бойынша әдеби-театрландырылған кеш ұйымдастырды.
Кеш барысында кітапхана қызметкерлері жазушының өмірі мен шығармашылығы туралы бейне ақпарат берді. «Оң қол», «Қонақтар» әңгімесін әдеби талқылауға белсене қатысқан Елшат Ардақұлы (№22), Назерке Алтайқызы (№22), Арайлым Қайратқызы (№22), Амина Орманбек (№4), Балым Байғали (№4) мәні мен мағынасы туралы өз ойларын білдірді. Тыңдаушыларға ерекше әсер қалдырған жазушының романтикалық, фантастикалық туындысы, бір тұлғаның бойындағы біріне – бірі жат жау екі сана туралы жазылған «Оң қол» әңгімесінің желісі бойынша Курчатов қалалық кітапханасының «Таңшолпан»және Курчатов қаласының №4 орта мектептің «Тұмар» көркемсөз оқу үйірмелерінің мүшелерінің жоғары деңгейде көрсеткен театрландырылған көрінісі болды. Психиатриялық ауруханада жатқан қыздың рөлін үйірме мүшесі Назерке Думанбек орындауы да ерекше әсер қалдырды, залда отырған көрермендер де қыздың аянышты тағдырына алаңдап отырды.
Шара соңында жас актерлердің өнеріне тәнті болған Әлихан Бөкейхан атындағы университетінің профессоры Махмут Түйебаев сөз алып, үйірме мүшелеріне алғысын білдіре отырып, шығармашылық табыс тіледі. Сондай-ақ, «Қазақ прозасының пырағы» атты кітап көрмесіне шолу жасалынып, кітапхана әкімшілігі атынан кітапханашы, үйірме жетекшісі Кучукова Роза Амантайқызына алғыс хат табысталды.