Адамзаттың Абайы: кең көлемді кітап көрмесі

13 ақпан күні Абай кітапханасында Абай Құнанбайұлының 180 жылдығына орай, қазақ әдебиеті мен мәдениетінің үлкен мұрасы саналатын ұлы ақынның шығармашылығын насихаттау мақсатында «Адамзаттың Абайы» тақырыбында кең көлемді кітап көрмесінің ашылу рәсімі өткізілді.
Арнайы ашылу рәсімін кітапхана директоры Мерей Қарт ашып, кітапханада атқарылып жатқан жұмыстарға тоқтала отырып, Абайдың ұлылығы туралы әңгіме өрбітсе, Республикалық «Абай Құнанбаев» қоғамдық қорының президенті Отантай Кәрібжанұлы, ақын өмірінен сыр шертіп, шығармаларының асқақтығы жайында сөз қозғап, кітапханаға өз алғысын білдірді. Тарих ғылымдарының кандидаты, профессор Кәрімов Мұхтарбек Қарпықұлы Абай еңбектері күллі қазақ баласының мұрасы деген ойларын ортаға салып, ұйымдастырылған шараға өз алғысын жеткізді.
Шара шымылдығын ҚР «Мәдениет және өнер саласының үздігі», Әміре Қашаубаев атындағы сыйлықтың иегері, дәстүрлі әнші Айдан Бауыржанұлының орындауында «Көзімнің қарасы» әнімен басталды.
Көрмеге Ш.Уәлиханов атындағы «Жас Ұлан» арнайы ерлер мектеп-лицей-интернаты» КММ ұландары, кітапхана оқырмандары қатысты.
Көрмеде Абайдың шығармалары, ғылыми еңбектері, аудармалары мен өміріне қатысты жазылған зерттеулер қойылды. Сонымен қатар, оның рухани мұрасына деген қызығушылықты арттыру мақсатында Абайдың философиялық ойлары мен өлеңдеріне терең үңілетін әдебиеттер ұсынылды. Кітапханамыздың сирек қорындағы құнды метриалдар мен Абайдың қазақ әдебиетіндегі орны мен мәдениетіміздегі ықпалы жөнінде кітаптар және мақалалар да көпшілікке таныстырылды.
Көрмеде келесі бөлімдер ұсынылды:
«Абай мұрасы – құдіретті сөз әлемі» – бұл бөлімде ақынның өлеңдері мен қара сөздерінен, оның терең ойларынан сыр шертетін кітаптар қойылды. Абайдың сөз өнері, тіл байлығы мен әдебиетке қосқан үлесі ерекше атап өтілді. Ақынның орыс, ағылшын, қытай, өзбек, кәріс, т.б әлем тілдеріне аударылып жарық көрген шығармалары қойылды.
«Абайдың өмірі және қоғамдық қызметі» бөлімінде Абайдың өмірі мен қоғамдық қызметіне арналған биографиялық деректер мен ғылыми зерттеулер көрсетілді. Атап айтқанда, Ахмет Байтұрсынұлы, Міржақып Дулатұлының мақалалары, Алихан Бөкейхановтың Абай жөнінде жазған неркологы, Тұрағыл Абайұлының естеліктері мен мақала-әзірлемелері ұсынылды.
«Абайдың ақын шәкірттері» бөлімінде Абайдың шәкірттері мен ізбасарларының шығармашылығы мен Абайтану ғылымындағы рөлі сөз болды. Көкбай Жанатайұлы, Әсет Найманбаев, Әріп Тәңірбергенұлы және т.б. ақын шәкірттерінің әдеби мұралары таныстырылды.
«Абайтану. Ғылым мен зерттеу» бөлімінде Абай шығармашылығының ғылыми тұрғыдан зерттелуі мен әдебиеттанушы ғалымдардың еңбектері М.Әуезов, М. Мырзахметов, Қ. Мұхамедқанов, Ғ. Есім, т.б абайтанушы ғалымдардың іргелі зерттеулері қойылды. Абайтану ғылымы мен оның терең зерттелуі туралы жазылған кітаптар көпшіліктің назарына ұсынылды.
Абайдың шығармашылығын кеңінен таныту мақсатында ұйымдастырылған бұл көрме жыл соңына дейін оқырмандар назарына ұсынылады.