Ерліктің үлгісі болған киелі мекен: библиосаяхат

30 мамыр 2014 жылы Абай атындағы кітапхана ұжымы Абай ауданында Шаған өзені бойында, қазіргі Тоқтамыс ауылы аумағында Хан Шыңғыс тауының Ақ тас жотасында орналасқан Қоңыр әулие үңгіріне шеккен библиокеруен сапары қуғын-сүргін құрбандарын еске алуға арналған шаралар кешенін толықтырды.

Кітапхананың сирек басылымдар қорындағы Абай, Шәкәрім, Әбікей Сәтпаев, Мұхтар Әуезов, Шайбай Айманов, алаш арыстары Әлімхан Ермеков, Жақып Ақпаев, Нәзипа мен Нұрғали Құлжановтар, Райымжан Мәрсеков мүше болып, Әлихан Бөкейханов Омбыдан жұмысына тығыз араласып, қазақ әлемі тақырыбындағы ғылыми-зерттеу мақалаларын жиі жариялап отырған Императорлық Орыс Географиялық Қоғамының Семей бөлімшесінің 1912 жылғы «Запискилерінің» VI басылымында жарияланған В.А.Брюхановтың «Конуръ – Ауліэ» зерттеуін оқи отырып, ғасырдан бұрынғы авторы суреттеген үңгір келбетінің бүгінгі бейнесін тамашалап, осында болған әйгілі адамдардан белгі қалды ма қарайладық. Қоңыр әулиемен орыс достарын таныстырған Абайдың автографы болғанын нақты деректерден білсек те, бұрынғы келушілердің шырақ жағып кіргенінен ыс басқан тас қабырғалардан жазуды ажырату әзірге мүмкін болмады.

Ел аузындағы аңыз әфсаналардан жеткен Қоңыр әулие-ана тұлғасы жайлы әңгіме тыңдалды. «Ақтабан шұбырынды, Алқакөл сұламадай» күрделі кезеңде қазақ-жоңғар соғысының куәсі болып, Қабанбай бастаған қол жеңіске жеткен Хан Шыңғыстың жотасындағы Қоңыр әулиеде мәңгі тыныштық тапқан ел тәуелсіздігі үшін күрескен батыр жауынгерлер рухынан бойымызға қайрат, жігер жинап қайттық.