Күншуақта кітап оқу – көңілді: оқу сағаты

18 маусым күні Абай атындағы кітапхана қызметкерлері кітапхана алаңында «Жазғы оқу мектебі» акциясы аясында «Күншуақта кітап оқу» тақырыбында оқу сағатын өткізді.

Бүлдіршіндердің кітап оқуға деген қызығушылығын арттыру мақсатында, Г.Чернышевский атындағы №1 мектебінің және №37 мектеп-гимназиясының «Балауса» жазғы лагері балаларына ұйымдастырылған іс-шара толық ашық алаңда, табиғат аясында өтті. Ашық аспан астында орнатылған әдемі үстелдерде балалар әдебиеті бөлімінің қорындағы ертегілер, әдеби шығармалар, шетел және орыс жазушыларының ертегілері, танымдық энциклопедиялар мен балаларға арналған журналдар ұсынылды. Кітапқа қызығушылық танытқан жас жеткіншектер шын ықыластарымен кітаптарды оқып, бір-бірлерімен ой бөлісті. Сонымен қатар, шараға қатысушылар мәнерлеп оқуда жарысып, кітапхана қызметкерлері ұйымдастырған ойындар мен викториналарға белсене қатысты. Шара соңында балалар кітапханаға жазылуға ниет білдіріп, балалар әдебиеті бөлімі жаңа оқырмандармен толықты.