«Алаш мұрасы – Мәңгілік Ел игілігінде»: онлайн-конференция
2017 жылы Алашорда үкіметінің 100 жылдық мерейтойы аясында Абай атындағы кітапхана Алматы облыстық С. Сейфуллин атындағы кітапханамен бірге «Алаш мұрасы – Мәңгілік Ел игілігінде» атты тақырыпта онлайн-конференция өткізді.
Конференцияға Семейден Абайдың мемлекеттік тарихи-мәдени және әдеби-мемориалдық қорық мұражайының ғылыми қызметкері, алаштанушы, тарихшы, журналист Мұратбек Кенемолдин қатысып, Алаш қаласының тарихы туралы тарихи деректермен бөлісті. Сондай-ақ Адашорда үкіметінің 100 жылдығына мұражай шығарған «Алаш мұражайының хабаршысы» журналындағы табылған түпнұсқа құжаттармен таныстырып өтті.
Семей қаласындағы қазіргі заман тарихын құжаттандыру орталығының бөлім меңгерушісі Қадырова Лаура архивте сақталған «Алашорда үкіметінің іс қағаздары» жайлы құнды деректерді жетісулық онлайн-конференцияға қатысушыларға айта отырып, архив шығарған «Алаштың алыптары» фотоальбомымен таныстырды.
Конференция барысында жетісулық оқырман қауым Шығыс Қазақстан облыстық Абай атындағы кітапханасының «Алаш» http://alash.semeylib.kz/ электронды кітапханасымен таныса отырып, алаш қайраткерлерінің еңбектерін, олардың қоғамдық-саяси қызметі туралы жазылған еңбектерді қалай іздеп табуға болатынын көрді.
Конференцияға жетісудан І. Жансүгіров атындағы Жетісу Мемлекеттік Университетінің тарихшы ғалымдары, Талдықорған қалалық білім басқармасының орта білім оқытудың жаңа технологиясы мен инновация бөлімінің бас мамандары, Іле ауданының кітапханашы мамандары қатысты. Алматы облысынан қатысқан ғалымдар, тарихшылар «Әлихан Бөкейханов – ұлт көсемі» атты тақырыпта, М. Тынышпаев атындағы облыстық тарихи-өлкетану музейінің аға ғылыми қызметкері Құрбан Бауыржан «Мұхамеджан Тынышпаев – алаш қозғалысының негізін салушылардың бірі» атты тақырыпта алаш қайраткерінің қоғамдық-саяси қызметі жайында өз ойларын ортаға салды. Іле аудандық кітапханасының оқырмандары «Кітапханадағы Алаш оқулары» атты тақырыпта өз ойымен бөлісіп, Іле аудандық кітапханасының оқырманы С. Торайғыровтың «Алаш ұраны» өлеңін оқыды.
