«Желсіз түнде жарық ай»: шығармашылық қолөнер көрмесінің тұсаукесері
15 қараша күні Абай атындағы кітапханада «Рухани жаңғыру» бағдарламасы және ұлы ақын Абай Құнанбайұлының 175 жылдық мерейтойы аясында балалар әдебиеті бөлімінің қызметкерлері жас жеткіншектердің қолынан шыққан туындыларын көпшілік назарына ұсынды. Қазақ ұлттық қолөнерін ерекшеліктерімен таныстыру мақсатында, Семей қаласының Жастар және балалар шығармашылық сарайында орналасқан «Ұлттық қолөнер» үйірмесінің жас мүшелерімен «Желсіз түнде жарық ай» шығармашылық қолөнер көрмесінің тұсаукесері болып өтті.
Тәрбиелік мәні зор көрменің тұсауын Қазақстан Суретшілер Одағының мүшесі, график – суретші Нұрбұлан Өтепбаев кесіп, үйірме мүшелеріне Абай портретін сыйға тартып ақ батасын берді. Алғы сөз алған «Қазақ тілі» халықаралық қоғамы облыстық филиалының төрағасы Орал Шәріпбаев, қолөнерші Сейілгүл Асхан балдырғандардың жұмыстарын бағалап, шығармашылық табыс тіледі. Көрмеде жас шеберлердің жұмыстарымен бірге ұлттық өнерді ұлықтап, оны дамыту жолында еңбек етіп жүрген қаламыздың хас шеберлерінің жүннен, қыштан, ағаштан, темірден жасалған қолөнер бұйымдары және кітапхана қорынан алынған З.Мұхамеджанұлының «Қазақтың кесте өнері», С.Төленбаевтың «Қазақтың ою-өрнектерінің жасалу жолдары», С. Асанованың «Қазақтың ұлттық киімдері және қолөнер тарихы» атты әдебиеттермен толықтырылып, көпшілік назарына ұсынылды.
Кештің шырайын кіргізіп, жас көрермендердің жүрегінен орын алған Оразғалиева Ақмаралдың Абай Құнанбаевтың «Күз» тақырыбына құммен сурет салған композициясы болды. Шара соңында үйірме жетекшісі Парида Сүлейменқызы үйірме жұмысы жеткіншектердің эстетикалық талғамдарының қалыптасуына, алға қойған мақсаттарының айқындала түсуіне игілікті ықпал етіп жатқандығы жайында әңгімелеп, жас шеберлерге алғыс хаттар табыстады. Ұлттық нақыштағы көрме «Айша-Бибі» қазақ ұлттық – мәдени орталығы мүшелерінің орындауында «Желсіз түнде жарық ай» әнімен өз мәресіне жетті.
