Көңіл маусымдары: тікелей эфир

  • 21.04.2020

2020 жылдың 14 сәуірінде Абай атындағы кітапхана ұжымының ұйымдастыруымен кітапхана қызметкері, ақын, республикалық, халықаралық жыр мүшәйраларының жүлдегері Бауыржан Игілікпен «Көңіл маусымдары» атты кітапханамыздың @semeybib инстаграм парақшасында онлайн кездесу өтті.

Кездесуге өнерге құмар, өлеңге құмар саны алпыстан аса көрермен қатысты. Жас ақын барша қойылған сұрақтарға, көрермен тарапынан келген сауалдардың бәріне шынайылықпен жауап берді.

Қазіргі уақытта шығармашылыққа қаншалықты көңіл бөлудесіз? – деген сұраққа;

  • Қазіргі оқшаулану уақыты барша өнер-білім ізденісіндегі адам үшін зор мүмкіндік. Мен өзі кітап құмар адаммын, жеке кітапханамда үш мыңнан аса кітап бар. Солардың ішінде оқуға уақыт таппай жүргендерімді қазір оқып, ой толыстырып, әлем әдебиетіндегі оқылмаған дүниелерімді оқып жатқан жайым бар.

Жалпы оқырмандарға қандай шығармаларды оқуға кеңес берер едіңіз?

  • Мен жалпы оқуға өзіміздің әдебиетті ұсынамын қашанда, өйткені біздің әдебиет әлем әдебиетінен кем емес. Жалпы қазақ әдебиетін оқуда өзіндік реттілікті сақтаған дұрыс. Мәселен ХХ  ғасыр «Қазақ әдебиетінің алтын ғасыры»-дейді, сол жерден Қадыр Мырза-Әли сияқты, Тұманбай Молдағалиев сияқты ақындарымызды оқып әуелгі платформамызды дұрыс қалыптастыруымыз керек.

Осындай, модератор және көрермендер сұрағына мазмұнды жауап қайтарды. Кездесу барысында ақыннан әуелі жыр сұралды. Өзіндік бояуымен, сөз саптауымен ерекшеленетін өлеңдерін қатысушылар сүйіп тыңдады. Сөз басында Бауыржан өзі әр түрлі аспаптарда ойнайтынын айтқан болатын, сол ретте көрермен қауым ән сұрап қолқалады. Бауыржан әуелі әні Т.Досымовтың, сөзі Ж.Әскербекқызының «Қара гүл»  әнін, кейін әні А. Жақсыбаевтың, сөзі Қ. Нұрқасымның «Аялдама» әнін орындап берді.

Ақынға қойылған сұрақтар өте көп болды. Барынша шынайы әрі мәнді жауап алған көрермен алғыстарымен ақ тілектерін жаудырып жатты.

Кездесу инстаграм желісі ұсынған бір сағат уақыттан асып кетті, желінің эфирді үзгеніне қарамастан қайталап қосқан байланысқа барша көрермен қайта қосылып жүздесу тағы жарты сағатқа созылды.

Сөз соңында Бауыржан көрермен қауымға өз шығармашылығынан баллада ұсынды. «Ит» деген ерекше тақырыппен ұсынылған осы туынды тыңдарман жүрегін тебірентпей қоймады.

Сөз соңында ақын барша қатысушыларға алғысын білдіріп, аздаған оқшаулану уақытында сабыр сақтап, үйде отырып ел болып қиындықты еңсеруге шақырды.

Мазмұнды кездесу мәнді жерінде, тәтті тілектермен өз мәресіне жетті