Қасірет пен тағдыр: кітап таныстырылымы
27 сәуір күні Абай атындағы кітапхана қызметкерлері ақын, жазушы, Қазақстанның еңбек сіңірген қайраткері Сәуле Досжанның «Қасірет пен тағдыр» кітабының онлайн-таныстырылымын ұйымдастырып, сұхбат өткізді. С.Досжан «Жыр тәж», «Үшінші есіктің құпиясы», «Жатқа туған бала», «Арман қала», «Үлкен үйдегі үрей», «Құдіретті қалам иесі», «Өгей жүрек», «Мое чужое сердце», «Сағыныш» атты кітаптардың авторы.
Автор Шығыс Қазақстан облысы әкімдігінің қолдауымен «Фолиант» баспасынан шыққан «Қасірет пен тағдыр» кітабын шығарудағы басты мақсаты Семей ядролық полигонының қасіретін жеткізу, қазақ халқының зұлмат заманды бастан кешкен мықты, қайсар ел екенін көрсету деп атап өтті.
Онлайн сұхбат барысында Сәуле Досжанға көрермен тарапынан көптеген қызықты сұрақтар қойылып, қазіргі таңдағы қазақ әдебиеті, балалар әдебиетінің қазіргі жай-күйі, жастар шығармашылығы, әлемдік классиктерден қандай авторлардың кітабын сүйіп оқитыны жайында ой өрбітті.
Сұхбат барысында жастардың қызығушылығын туғызған сұрақтардың бірі әдеби агенттік, жастар үшін әдеби агенттік қаншалықты қолжетімді деген сұраққа автор кеңінен жауап берді. Осы әдеби агенттік арқылы автордың «Өгей жүрек» кітабы Еуразиялық конкурсқа қатысып, жүлделі II орынды иеленгені, әлемнің 6 тіліне аударылып басылғаны, еуропадағы ең үздік сыйлықтардың бірі Букер сыйлығын алғандығын сөзге тиек етті. Әдеби агенттіктің ұйымдастыруымен ҚР Ұлттық академиялық кітапхана «Өгей жүрек» кітабының Германияда тұсаукесерін өткізгендігі жайында сөз қозғады. Мықты жазушы болу үшін әдеби агенттік қажет екенін баса айтты.
Сәуле Досжан түрік жазушысы Орхан Памук туралы, оның жұмыс істеу стиліне, көңіл бөліп көп нәрселер үйренетін, көп оқу керектігі, постмодернистік стиль жайындағы ойларымен бөлісті.
Қазіргі таңда балалар әдебиетін дамытуға көп көңіл бөлу қажеттігін айтып, «Ауылдан шыққан миллионер» деген повесін жазып жүргенін, кішкентай балаларға кітап оқуды қызықтыру қажеттігін айтты. Ұйымдастырылған шараға ризашылығын білдіріп, қатысушы оқырмандарына алғыс жолдады.
