Тікелей эфир
2020 жылдың 4 мамырында ШҚО Абай атындағы әмбебап кітапханасы белгілі ақын, Қазақстан Жазушылары одағының Нұр-Сұлтан қаласындағы филиалының директоры, «Алаш» әдеби сыйлығының лауреаты Дәулеткерей Кәпұлымен инстаграм парақшасы арқылы онлайн кездесу өткізді. Кездесу Жазушылар одағының қазіргі жай-күйі турасындағы әңгімемен басталып, еліміздегі қаламгерлердің ахуалы, кітап таралымы, әдеби агенттіктер жайлы пікіралыспен жалғасты. Дәулеткерей Кәпұлын көпшілік қауым айтыскер ақын ретінде де жақсы біледі. Ақын өз кезегінде айтыстың бүгінгі келбетін де тіліне тиек ете кетті. Екі сағаттан астам уақытқа созылған сұхбаттың соңында ақын өз шығармашылығынан өлең оқып, Сұлубай батырдың әнін де орындап берді. Түрлі тақырыптарға ой салып, сөз қозғаған ақын көрермендердің көңілінен шығатын сұхбат беріп, Абай атындағы кітапхана қызметкерлеріне алғысын білдірді.
