Абай – қазақ ойын сақтаушы және оны әлемдік деңгейге көтеруші: тікелей эфир

Шығыс Қазақстан облыстық Абай атындағы кітапхана қызметкерлері 4 маусым күні Абайдың  175 жылдық мерейтойы қарсаңында  абайтану ғылымына байланысты, әр бейсенбі сайын өткізілетін тікелей эфирін белгілі ғалым, философия ғылымдарының докторы, академик, белгілі қоғам қайраткері  Ғарифолла Есіммен  өткізді.

Сұхбат барысында ғалым абайтану дәрістеріне тоқтала келіп, абайтану саласын  мектепте қай сыныптардан бастап енгізу қажеттігі жайында, оны студенттерге, бұқара халыққа қалай насихаттау жолдарын түсіндіріп берді.

Академик «Хакім Абай» деген кітабына тоқтала келіп,  Абайдың шетелге танымалдығы жайында сөз қозғады. Өзінің Францияда болғанда сапарында  Абай туралы оқыған лекциясына француз халқының қандай әсерде қалғандығын сөз етті.

Сөз соңында Абайдың келер ғасырдың да, өткен ғасырдың данышпаны – деген ой қорытылып, қазақ халқының мақтанышы, қазақ халқының  ақыл ойының биігі – Абай деп сұхбат тәмамдалды.