Тұрсынғазы Рахимов туралы сыр: тікелей эфир
2020 жылдың 9 маусымында ШҚО Абай атындағы әмбебап кітапханасының ұйымдастыруымен дәстүрлі әнші, Әміре Қашаубаев атындағы Республикалық байқаудың лауреаты Алтын Смасеитовамен «Тұрсынғазы Рахимов туралы сыр» тақырыбында инстаграм желісінде онлайн кездесу өткізді.
Жүздесу барысында Алтын ханым Тұрсынғазы Рахимов өзінің қолына алғаш домбыра ұстатқан ұстазы екенін, дәстүрлі әнге басқан қадамын қолдаған алғашқы жан екенін айтты.
Ардақты ұстазынан үйренгені мен түйгенін, тіпті ұстазы емес шәкірттерінің әкесіндей болған қадірлі ағаның қасиетін Алтын ханымның сөзінен ұғындық.
Сәбидей көңілді ұстазынан алғашқы үйренген «Сәби болғым келеді» әні екен. Сөзінің дәлеліндей сол әнді эфир барысында барша тыңдарманға нақышына келтіріп орындап берді.
Ұстазы жайында көптеген естеліктермен ақтарыла бөліскен әнші, өзініңде қазіргі таңда ұстаздық қызмет атқарып жүргенін тілге тиек етті.
«Тұрсынғазы ағам оқушыларына қатты айғайлап ұрсып көрмеген, қашанда кісі көңіліне қарап қатты сөз айтудан аулақ тұратын. Дау-дамайдың арасына кіре бермейтін, жанына келген адамына жанын беретін ұстазымыз еді, бізде әлі күнге сол ұстазымыздан алған тәлім тәрбиемізбен келеміз» – деп ағынан жарылды.
Эфир соңында Тұрсынғазы Рахимовтың ән қорында жүзге тарта ән барын, олардың жартысынан көбі Мұқағали Мақатаевтың өлеңіне жазылғанын, бала күнінде Тұрсынғазы ағамыз Мұқағалидан бата алғанын, мұзбалақ ақынның бала Тұрсынғазыға артқан сенімі мол болғанын білдік.
Сөздің соңын ұстазының «Ақ бөкен» әнімен аяқтап, желідегі тыңдарманға алғысын білдіріп Алтын ханым сөзін тәмәмдады.
Бізде алтын уақытын бөлген алтын дауысты Алтын ханымға ілтипат білдіріп, эфирді аяқтадық.
