Абай және кітапхана: тікелей эфир

6 тамыз күні Шығыс Қазақстан облыстық Абай атындағы әмбебап кітапханасы желідегі Facebook парақшасында «Абай және кітапхана» тақырыбында тікелей эфир өткізді.

Кітапхана қызметкері мерзімді басылымдар бөлімінің басшысы Манжибаева Жаңылгүл Әділбекқызы «Абай және кітапхана» тақырыбындағы сұхбатында Семейдің Абай атындағы әмбебап ғылыми кітапханасының іргетасы 1883 жылдың күзінде саяси жер аударылғандардың ұйымдастыруымен, зиялы қауым мен қала көпестерінің қайырымдылық көмектерінің арқасында оқырмандарға есігін айқара ашқаны жайында әңгімеледі.

Сол замандағы кітапхана қорында қала халқының сыйға тартқан 270 дана кітабы болып, 130 оқырманға қызмет көрсеткені жайында айта келе кітапхананың алғашқы оқырмандарының бірі   Абай Құнанбаев уақыт өте келе кітапхананың тұрақты оқырманы болғандығы туралы айтты.

Абай атамыздың сол заманда терең үңіліп оқып, қолының табы қалған орыс классиктері Пушкин, Лермонтов, Толстой, Салтыков-Щедрин т.б. , Батыс Еуропа әдебиетінің тамаша үлгілері: Спенсер, Тэйлор, Дрепер, Уоллэс, Милль, Шекспир, Гете, Шиллер, Гейне, Байрон т/б. әдебиеттер бүгінгі күні сирек басылымдардың алтын қорын құрап отырғандығын тілге тиек етті.

Заманында Абай Құнанбайұлының қоғамдық жұмысқа да белсене араласқандығын дәлелдейтін 1897 және 1900 жылғы «Памятная книжкалары», «Бастауыш білім беру қоғамының 1893/94 жылдарғы жұмыс есебі», «Императорлық Орыс Географиялық Қоғамының Батыс-Сібір Бөлімінің Семей бөлімшесінің жариялаған «Запискиінің…» 1907 жылғы 3-саныннда жарық көрген Әлихан Бөкейхановтың  «Абай (Ибрагим) Кунанбаев» атты мақаласы, «Семипалатинские Областные ведомости» газеті, Николай Коншиннің «Что могут дать Семипалатинские архивы для краеведения» мақаласы және “Сельско-хозяйственный Обзоръ Семипалатинской области за 1914 годъ” атты статистикалық ғылыми зерттеу еңбек жайында құнды деректермен бөлісті.

Эфир кезінде қызығушылық танытқан оқырмандардың сауалдарына да жауап беріліп сұхбат тамаша өрбіді.