«Абай әлемі» – 2020 кітаптар топтамасының таныстырылымы
25 қараша күні Абай атындағы кітапхана, Шығыс Қазақстан облысы мәдениет басқармасы және Қазақстан Жазушылар Одағы Семей филиалымен бірлесіп Ұлы Абайдың туғанына 175 жыл толуына арналған «Рухани жаңғыру» бағдарламасы аясында Шығыс Қазақстан облысы әкімінің қолдауымен жарық көрген «Абай әлемі» кітаптар топтамасының 2020 жылғы шығарылымының таныстырылымын ұйымдастырды. ZOOM платформасында ұйымдастырылған шараға Қазақстан Жазушылар Одағының мүшелері, жазушылар, ғалымдар, филологтар, мәдениет саласының қызметкерлері, ЖОО, колледждердің оқытушылары мен кітапханашылары, мектеп мұғалімдері мен кітапханашылары, кітапхана оқырмандары, БАҚ өкілдері қатысты.
Шығыс Қазақстан облысы мәдениет басқармасының мәдениет және өнер бөлімінің басшысы Ұ. Сағадиев «Абай әлемі» жобасымен және жоба аясында жарық көрген басылымдармен таныстырып, кітап авторлары мен құрастырушыларына алғысын білдірді.
Жобаның бас редакторы, Қазақстан Жазушылар одағының мүшесі, «Құрмет» және «Парасат» ордендерінің иегері Медеу Сәрске жоба аясында атқарылған жұмыстардың барысымен таныстырып, алдағы уақыттағы жоспарларымен бөлісті.
Қазақстан Жазушылар одағы басқармасы төрағасының орынбасары, ақын Б. Жақып еліміздің әр өңірінде ір авторларының кітаптарын жарыққа шығару шаралары туралы айта келіп, шығыс өңірінде Д. Рамазан, Т. Жанғалиев, А. Кемелбаева сынды ақын-жазушылардың да кітаптарын жариялау жөнінде ұсынысын білдірді.
«Абай» атындағы халықаралық мәдениет пен өнерді қолдау қорының атқарушы директоры А. Ғафуров елімізде оқу мәдениетін арттыруда атқарып отырған қызметі мен демеушілік жасаған шаралары туралы баяндап, кітап авторларын құттықтады.
Шәкәрім мемлекеттік университетінің профессоры А. Еспенбетов Абайтанудың 5 томдық кітабымен және 1909 жылы басылып шыққан репринттік басылымы – «Қазақтың ақыны Ибраһим Құнанбайұғлының өлеңімен» кітаптарымен, университеттің Абай институтының директоры Ж. Әубәкір 4 томдық «Абай және ақын шәкірттер мұрасы» басылымына енген ақын шәкірттерінің мұраларымен таныстырды.
Абайтанушы, алаштанушы ғалым Т. Жұртбай өзінің дайындаған Құнанбай қажы жайында көпшілікке бұрын белгісіз архив құжаттарына сүйеніп жазған «Рух сұлтандары» кітабы жайында әңгімеледі. Жазушы Б.Щербаков өзінің орыс және ағылшын тілінде жарық көрген «Звездная степь Жидебая» шығармасы туралы баяндап, Сапарғали Әлімбетов мұраларын зерттеуші ғалым, ф.ғ.к. М. Иманжапар Сапарғали ақынның мұралары жөнінде мол мағлұмат берді.
Шара барысында кітап авторлары жоба аясында жарық көрген кітаптардың міндетті түрде ЖОО мен колледждердің және мектеп кітапханаларының қорына түсуі керек екендігін ескертіп, құзырлы мекемелер осы мәселенің шешімін табуына атсалысуын сұрады.
Шараның модераторы Мерей Қарт шараны қортындылап, кітап авторлары мен құрастырушыларына зор алғысын білдірді.
