Абайдың ұлы жұмбағы: тікелей эфир

Шығыс Қазақстан облыстық Абай атындағы кітапхана қызметкерлері 3 желтоқсан күні Абайдың  175 жылдық мерейтойы қарсаңында  абайтану ғылымына байланысты, әр бейсенбі күні «Абай әлемі» жобасы аясында өткізілетін тікелей эфирін белгілі ақын, «Дарын» мемлекеттік жастар сыйлығының лауреаты, Қазақстан жазушылары одағының басқарма мүшесі Ақберен Елгезекпен өткізді.

Онлайн жүздесу барысында ақын Абайдың 170 жылдығы қарсаңындағы Шыңғыстау өңірінде түсірген деректі фильмі туралы кеңінен тарқатып әңгіме өрбіте келіп, Абайдың дүние жүзі данышпандарының арасынан алатын ерекше орыны туралы айтты. Ұлы ақынның қара сөздері мен өлеңдерінен мысал келтіре отырып «үш сүю», «толық адам» концепцияларын талқылады. Биылғы Ұлы ақынның мерейтойы қарсаңында Абай шығармалары тереңірек зерттеліп зерделенгенін де айтып өтті.

Абайдың діни көзқарасы жайында айтылып, оның оқыған кітаптары мен ақын айналасындағы жақындарының естеліктері туралы да  тілге тиек болды. Сұхбат аяғында Ақберен Елгезек оқырмандар сауалына жауап беріп, кітапхана ұжымына сұрақ қоюшы қауымға алғысын айтып, сөзін аяқтады.