Ә.Ермековтың қоғамдық-саяси және ағартушылық қызметі: бейнелекция
3 наурыз күні Абай кітапханасында «Алаш» онлайн-жобасы аясында т.ғ.к., профессор, Еуразия гуманитарлық институты тарих факультетінің доценті Қанат Садуақасұлы Өскембаев «Әлімхан Ермековтің қоғамдық-саяси және ағартушылық қызметі» тақырыбында Zoom платформасында бейнелекция жасады.
Қанат Садуақасұлы Мемлекет және қоғам қайраткері, Алашорда үкіметінің мүшесі Ә.Ермеков жайында мол мағлұмат берді. Алаш қайраткерінің Қазақ автономиясын құрудағы өлшеусіз еңбегін зерделей отырып, қоғамдық-саяси, оқу-ағартушылық қызметі жайлы еселі еңбегі жайлы баяндады. Әлімхан Әбеуұлының қайраткерлігін, қоғамдық-саяси қызметін ашып көрсетуде тарихи зор еңбегінің бірі – Қазақ автономиясы шекарасының біртұтастығын жанқиярлықпен қорғауы, патша өкіметі тұсында қазақтың құнарлы жерлерін қайтару мәселесіне де баса назар аудара баяндады. Әлімхан Ермеков жайлы өзі жазған «Тұлға тағылымы» атты монографиясына енгізген құнды құжаттарға тоқталды. Алаш арысы жайлы басқа да тың мағұлматтарды Семей қаласының қазіргі заман тарихын құжаттандыру орталығынан, Орынбор, Омбы, Мәскеу қалаларындағы архивтерден де қарастыруға болады деген кеңесін ұсынды. Алаш қайраткеріне орнатылған ескерткіштер тарихы туралы және отбасылық жағдайы мен бүгінгі ұрпақтарының тағдыры туралы ақпарат берді.
