Кино атасы – Шәкен Айманов: кітап көрмесі

14 сәуір күні ШҚО Абай атындағы әмбебап кітапханасында «Ұлы даланың жеті қыры» бағдарламасының бір қыры «Тарихтың кино өнері мен телевизиядағы көрінісі» аясында оқырман қауымға «Кино атасы – Шәкен Айманов» тақырыбында кітап көрмесі ұйымдастырылды.

Кітапхана оқырмандары көрмемен танысу барысында қазақ өнерінің шоқтығы биік тұлғасы, талантты актер, әрі режиссер Шәкен Аймановтың  ұлттық театр өнері мен кино саласының қалыптасуы мен дамуы үшін бүкіл ғұмырын арнағаны жайлы, “Дала қызы”, “Махаббат туралы аңыз”, “Біз осында тұрамыз”, “Біздің сүйікті дәрігер”, “Бір ауданда”, “Ән шақыруда”,  “Алдар көсе”, “Тақиялы періште” және т.б. ұлттық кинематографияның алтын қорына енген фильмдер  туралы мағлұмат алды.

Көрмеге  Шәкен Аймановтың өміржолы, шығармашылығы, актерлік, режиссерлік шеберлігі туралы материалдар қойылды.  Көрмеге қойылған бірнеше кітап оқырмандар назарың аударды.  Атап айтар болсақ, К. Кенжетаевтың «Дархан дарын»,  «Халық перзенті» сериясымен жарық көрген «Шәкен Айманов» фото-альбомы, К. Сирановтың «Шакен Айманов – актер и режиссер кино», М. Берковичтің «Кадры неоконченной киноленты», «Кино и вся жизнь»  атты естеліктер. Дарынды актер, шебер режиссер қазақ киносының негізін қалаушылардың бірі Шәкен Айманов қазақ өнерінің жанданып, дамуына  үлкен үлесін қосты.