Атаңның баласы болма, адамның баласы бол: тікелей эфир
Ағымдағы жылдың 14 сәуірінде Абай кітапханасының Instagram желісіндегі парақшасында кәсіпкер, меценат, «Tas Group» компаниялар тобының негізін қалаушы, «ASSYLTAS» Қоғамдық қорының президенті Дулат Тастекеевпен тікелей эфир өтті.
Сұқбат барысында Дулат мырза барша эфирге қатысушы оқырмандарымызбен қонақтарды атқарып жатқан жұмыстарымен таныстырды.
Меценаттың қолдау көрсетіп жүрген үлкен шарасының бірі ол қазақтың ұлы өнері – айтыс. Жыл сайынғы дәстүрлі түрде өтіп келген «Алтын домбыра» айтысында көрермен көзайымына айналған ақындарға стипендия ұсынып келген. Аталмыш дүбірлі дода өзінің белгіленген шартына сәйкес өткен жылы өз мәресіне жеткен. Осы орайда биылғы жылы «ASSYLTAS» Қоғамдық қорының ұйымдастыруымен төрт кезеңнен тұратын «Асыл домбыра» атты ақындар айтысын ұйымдастыру қолға алынғанын жеткізді. Қымбат әрі құнды тастармен көмкерілген домбыра айтыстың соңғы кезеңінде Тарбағатай жерінде өткізілетін дүбірлі додада үздік шыққан аныға ұсынылады дейді кәсіпкер.
Дулат мырза бастаған «Tas Group» компаниялар тобының ұйымдастыруымен өтіп жатқан мәдени шаралар мұнымен шектелмейді. Өткен жылы жас айырмашылықтарына қарамастан қазақтың үздік 100 өлеңін жаттаған өрендердің сайысы басталғанын, және биылғы жылы сол жоба жалғасын табатынын бірі білсе, бірі білмейді.
Сонымен қатар «ASSYLTAS» Қоғамдық қорының жыл сайынғы әртүрлі сала – ғылым, спорт, әдебиет, және әр ай сайын Отандық жас кәсіпкерлерді қолдау мақсатында ұсынылып келе жатқан түрлі стипендиясы бар екенін тілге тиек етті.
Жомарт жүрек, ұлтжанды азаматтың бірі Дулат Тұрсынұлы өзінің табысты бизнесін ұйымдастырып, дамытып қана қоймай, біраз жылдан бері қайырымдылықпен де айналысып келеді, осының айғағы ретінде қаламызда құрылысы талай жылдан бері қаңырап тұрған мешіттің жаңданып бой көтеруі. Аталмыш іс-шара барысында Дулат Тұрсынұлы қазіргі таңда өзекті болып отырған «Дағдарыс уақытындағы бизнесті дамыту», «Қаржылық сауаттылық», сонымен қатар «ASSYLTAS» Қоғамдық қорының өлке руханиятын дамытуға қосып жатқан үлесі т.б. тақырыптарда әңгіме өрбітіп, тікелей эфир қатысушылары тарапынан қойылған сұрақтарға жауап берді.
