«Білгенге маржан» кітабінің тұсаукесері
20 сәуір күні Қазақстан Жазушылар Одағы Семей филиалы мен Абай атындағы кітапхананың ұйымдастыруымен Zoom платформасында республикалық «Абай» журналының кітапханасы сериясымен жарық көрген «Білгенге маржан» кітабінің таныстырылымы өтті. Ақын, «Абай» журналының бас редакторы Мұратбек Оспановтың құрастыруымен ұлы Абайдың мерейтойына тарту ретінде дайындалған жинақтың таныстырылымына зиялы қауым өкілдері мен әдебиетке құштар кітапхана оқырмандары қатысты.
«Білгенге маржан» жинағына республикалық «Абай» журналының 1918 жылы шыққан бірінші санында жарияланған алғашқы редакторы Жүсіпбек Аймаутовтың «Журнал туралы» деп аталатын мақаласынан бастап еліміз Тәуелсіздік алғаннан кейін қайта жарыққа шыққан журнал беттерінде 1992-2020 жылдар аралығында жарық көрген абайтанушылардың мақалалары қамтылған.
Шара барысында ғалым, Қазақстанға еңбегі сіңген қайраткер, профессор Арап Еспенбетов қазақ әдебиетіне жан берген Абайдың ойшылдық даналығын көрсету мақсатында жарық көрген жинақ абай тану ғылымының марқайғандығының белгісі деген бағасын берді. Егер осы жинақтың кейінгі томдарын жарыққа шығару жалғасын тауып жатса Абайдың ақындық кітапханасын терең зертеген абайтанушылардың мақалалары, Абайдың шығармалары жайлы шетелдегі құнды еңбектер енсе деген ұсыныстарын білдірді.
Сөз кезегінде Абай атындағы Қазақ ұлттық педагогикалық университетінің С.Қирабаев атындағы Қазақ әдебиеті кафедрасының доценті, профессор Марат Бекбосынов жинақты құрастырып, баспаға дайындаған М.Оспановқа жылы лебізін білдіріп, жинақтың жалғасы жарық көруін тілеп, онда абайтануға қатысты жарияланбаған құнды мақалалар жарияланса, елімізде «Абай» журналын арнайы ғылыми басылымдар қатарына қосса деген ұсынысын білдірді.
Сонымен бірге, шарада сөз алған Шәкәрім атындағы университеттің филалогия факультетінің деканы, ф.ғ.к., доцент Айбар Қадыров та бұл жинақ абайтану ғылымына рух берер үлкен жинақтардың бірі деген бағасын беріп, кітап оқырмандарының көп болуын тіледі.
Шара соңында жинақты құрастырған М.Оспанов кітаптың жарыққа шығуына үлес қосқан Абай атындағы кітапхана ұжымы мен шараны ұйымдастырушыларға алғысын айтып, шара барысында айтылған ұсыныс-тілектерді қабыл алып, қатысушы барлық зиялы қауым өкілдері мен оқырмандарға ризашылдығын білдірді.
