Саналы ұлт – сапалы ұрпақ: кездесу

30 сәуір күні Шығыс Қазақстан облыстық Абай атындағы әмбебап кітапханасының «Парасат жолы» орталығында белгілі ғалым, философия ғылымдарының докторы, академик Ғарифолла Есіммен кездесу сағаты өтті. «Саналы ұлт – сапалы ұрпақ» деген тақырыпта ұйымдастырылған кездесуде ғалым абайтану төңірегінде сөз бастап, бүгінгі күнде данышпан еңбектерінің әлі толық зерделенбей жатқан тұстарын, абайтану саласының жолға қойылмай келе жатқанын тілге тиек етті. Хәкім Абай шығармаларынан үзінділер келтіре отырып, ақынның діни һәм әлеуметтік көзқарастарына кең талдау жасады. Ғарифолла Есім Абайдың қара сөздері арқылы келешек ұрпақтың адамдық келбетін, кісілік сапасын қалай арттыруға болатынына терең тоқталды. Кездесу барысында қатысушылар көкейінде жүрген сұрақтарын қойып, мазмұнды жауап алды. Мектеп қабырғасынан бастап дұрыс тағылым, ұлттық тәрбие алған ұрпақ қана елдің сапасын арттыратынын айтты ғалым. Кездесу соңында қатынасушылар ғалымға шараның маңыздылығын айтып, алғысын білдірді