Жамбыл мұрасы – мәңгілік елдің мирасы:әдебі дежавю
12 мамыр күні ҚЖО Семей өңірі филиалы мен Абай атындағы әмбебап кітапханасының ұжымының ұйымдастыруымен айтыскер ақын, жыршы Жамбыл Жабайевтың 175 жылдық мерейтойына орай Zoom платформасында «Жамбыл мұрасы – мәңгілік елдің мирасы» тақырыбында әдеби дежавю өтті.
Аталған шараға еліміздің әр өңірінен ақын-жазушылар, ғалымдар және кітапханашылар қатысты. Әдеби онлайн басқосудың модераторы Қазақстан Жазушылар Одағының мүшесі, ақын, кітапхана қызметкері Мерей Қарт болды. Алғашық сөз арнайы Тараз қаласынан қосылып отырған Жамбылтанушы, белгілі журналист Қалыбек Атжанға берілді.
«- Жамбыл мұрасы әлі толық зерттеліп біткен жоқ. Жастық шағында жазған өлеңдері, алыс-жақын ел арасындағы айтысы толық халыққа жете қоймады. Жамбылдың жоқтаушысы да, мұрасын насихаттаушы да халық. Ендеше бәріміз бірігіп ақынның рухани қазынасын молайтып, халықпен қауыштыра берейік» – деді Қалыбек Атжан.
Әдеби дежавюдің көрігін айтыскер ақын Серік Қалиев қыздырды. Жамбыл Жабайев жайлы сирек айтылатын деректер мен ерекше зерделі айтыстарына тоқталды. Жамбыл мұрасын насихаттау, ғылым жолын ілгерлету мақсатында ұсыныстар білдірді.
Ақынның рухани қазынасы ел ішінде жиі айтылуын әр түрлі әдеби сайыстар арқылы қолға алу керектігін Ақсуат мәдениет үйінің басшысы, журналист Шәкен Мәлікқызы баса айтты.
Әдеби жиын соңы мерейтой иесінің жалынды жырларымен аяқталды.