Алаш арысы Райымжан Мәрсеков: бейнелекция
Тамыздың 18 жұлдызында Шығыс қазақстан облыстық Абай атындағы әмбебап кітапханасы фейсбук әлеуметтік желісінде “Алаш арысы Райымжан Мәрсеков” тақырыбында бейнелекция өткізді. Лекция оқыған белгілі ақын, алаштанушы, сазгер Құсмілия Нұрқасым. Лекция Алаш партиясының құрылуына Абайдың әсері жайлы басталып, жиырмасыншы ғасыр басындағы ұлт интелегенциясына ойысты. Әлихан Бөкейхан, Міржақып Дулатов, Ахмет Байтұрсынов сынды негізгі қайраткерлер сөз болып, осы ерлердің жанында жұрт үшін жанын берген азаматтар аталды. Оның ішінде қазақтан шыққан алғашқы заңгер Райымжан Мәрсеков өмірбаяны, еткен еңбегі, қосқан үлесі бүге-шүгесіне дейін талқыланды. Құсмілия Жырғалұлы ұстазы Қайым Мұхамедхановтың ауызынан естіген құнды ақпараттармен, естеліктермен әңгімесін тұздықтады. Егемен ел болып қалу үшін осы күні арыстай азаматтарымызды ұмытпаудың, ұлықтаудың маңызын айтып өтті. Шара барысында Райымжан Мәрсековтың «Қазақ қайда бара жатыр?» және алашордашының ұрпағы Тұрдықан Шериязданқызы Мәрсековтың «Кешулер» еңбектері оқырман қауымға таныстырылды. Сөз соңында лекция оқушы желі қолданушыларының сұрақтарына жауап беріп, көпшілік қауымның алғысын алды.