«Менің жылдарым – менің байлығым …»: ардагерлермен мерекелік кездесу

Күзгі күнтізбеде жүрек терең жылулық сезіміне толы ерекше күн бар, ол 1 қазан – Халықаралық қарттар күні.

Айтулы мереке күні «Отбасы орталығы» Қоғамдық Қоры Абай атындағы облыстық кітапханамен бірлесіп Семей қаласының түрлі сала ардагерлерімен мерекелік кездесу өткізді.

Бұл мереке тек қарт адамдар үшін ғана емес, оларға назар аударылып, құрмет көрсетіліп, өткен еңбектерін еске алып, игі істері үшін ғана емес, барлық басқа ұрпақтар үшін де алғыс білдіретін күн. Дәл осындай сәттерде ұрпақтар арасындағы байланыс шынымен сезіледі. Сондықтан кездесуге тек еңбек ардагерлері ғана емес, қала жастары, Радиотехника және байланыс колледжі студенттері де қатысты.

«Отбасы орталығы» Қоғамдық Қорының президенті Жибраева Жанна Жағыпарқызы Халықаралық қарттар күнін мерекелеудің маңыздылығын атап өтіп, қонақтарды осы тамаша күнмен құттықтады.

Сонымен қатар еңбек ардагерлеріне құттықтау сөздерін Семей қаласының Достық үйінің, Абай атындағы облыстық кітапхананың, Радиотехника және байланыс колледжінің өкілдері білдірді.

Іс-шара барысында кітапханамызды он жылдан астам уақыт басқарған Сағила Жұмағалиқызы Жұмағұлованы келе жатқан 80 жылдық мерейтойымен, ал, әріптесіміз Оразбике Құмарқызы Рүстемханованы құрметті демалысқа шығуымен құттықтады.

Мерекенің шарықтау шегі қалалық мәдениет үйі әртістері мен Семей қаласының Жастар сарайының балалар ұжымдарының мерекелік, музыкалық құттықтауы болды.