Ақпараттық ресурстар: тәжірибе алмасу
7 қараша 2013 жылы Шығыс Қазақстан облыстық Абай атындағы әмбебап кітапханасы қабырғасында «Ақпараттық ресурстар: тәжірибе алмасу» дөңгелек үстел өткізілді.
Өткізілген уақыты: 7 қараша 2013 жыл. Өткізілген орны: Шығыс Қазақстан облыстық Абай атындағы әмбебап кітапханасы. Қатысушылар: Қазақстан Республикасының Ұлттық кітапханасы, Ақмола облыстық Жұмабаев атындағы кітапхана кітапханашылары, қала колледждерінің кітапханашылар және Абай атындағы әмбебап кітапхана қызметкерлері. Қатысушылар саны: 50 адам. Мақсаты: кітапханалардың ақпараттық қорларымен, мәдени-көпшілік іс-шараларды ұйымдастыру мен оқырмандарға қызмет көрсетудегі жұмыстың жаңа түрлерімен танысу.
7 қараша 2013 жылы Шығыс Қазақстан облыстық Абай атындағы әмбебап кітапханасы қабырғасында «Ақпараттық ресурстар: тәжірибе алмасу» дөңгелек үстел өткізілді. Бұл іс-шараға Қазақстан Республикасының Ұлттық кітапханасының қызметкерлері – Сәйденбаева Ә.Ш., Үсенова Г.Д., Болатова Г.А. және Ақмола облыстық Жұмабаев атындағы кітапхана қызметкері – Динара Еменжанқызы, сонымен қатар Семей қаласы колледждерінің кітапханашылары мен Абай атындағы әмбебап кітапхана қызметкерлері қатысты. Дөңгелек үстел барысында кітапханашылар сирек қорды сақтау мен оларды электронды нұсқаға көшірудегі тәжірибелерімен алмасты, кітапханаларының көрсеткіштері мен жетістіктерін атап өтті. Сонымен қатар Ұлттық кітапхана қорында сақталған сирек мерзімді басылымдар туралы ақпарат берілді. Ұлттық кітапхана қызметкерлері ақпараттық-библиографиялық бөлімде баспа қызметіне ерекше көңіл бөлінетінін айтты. Кітапханашылар библиографиялық көрсеткіштермен танысты, олардың ішінде «Қазақстан тарихы (көне дәуірден ХХ ғасырдың бас кезіне дейін)» – көрсеткіш кітаптар мен журнал мақалаларын, Қазақстан тарихының мәселелері бойынша 1985 жылдан 2006 жылдың желтоқсан айына дейінгі баспа бетінде жарық көрген мәліметтерді қамтиды. ҚР Ұлттық кітапханасы Қазақстан Республикасының Президенті Н.Ә.Назарбаевтың «Қазақстанның әлеуметтік жаңғыртылуы: Жалпыға Ортақ Еңбек Қоғамына қарай 20 қадам» бағдарламасының негізінде еліміздің ауыл шаруашылығын дамытуға айтулы үлес қосқан атақты механизатор, тың игеруші, Социалистік Еңбек Ері Кәмшат Дөненбаеваның 70 жасқа толуына орай өмірі мен қызметіне арналған библиографиялық көрсеткіш басып шығарды.
Мұқан Төлебаевтың 100 жылдық мерейтойына арналған, «Қазақстан өнері» библиографиялық сериясы аясында жарық көрген ұсыныстық библиографиялық көрсеткіш қатысушыларды ерекше қызықтырды. Көрсеткіштің бірінші жартысына қазақ тіліндегі, екінші жартысына орыс тіліндегі әдебиеттер жинақталған, 1943 жылдан 2013 жылдың наурыз айына дейінгі баспа ретінде жарық көрген басылымдар қамтылды. ҚР Ұлттық кітапханасында «Қазақстан Республикасының аталып өтілетін және еске алынатын күндер тізбегі» 1966 жылдан бастап жыл сайын қазақ және орыс тілдерінде шығарылады. Қатысушылар назарына жақында басып шығарылған Қазақстан Республикасының 2014 жылы аталып өтілетін және еске алынатын күндер тізбегі ұсынылды. ҚР Ұлттық кітапханасы аталған библиографиялық басылымды Абай атындағы кітапхана қызметкерлеріне сыйға тартты. Ақмола облыстық Жұмабаев атындағы кітапхана қызметкері слайд көрсету арқылы өткізілген мәдени-көпшілік іс-шаралармен таныстырды. Абай атындағы кітапхана қызметкерлері іске асырылып жатқан «Книгоноша» және «Библиокөмек» әлеуметтік жобаларымен және «А дан Я-ға дейін» атты электронды энциклопедиясымен таныстырды.
Дөңгелек үстел барысында басылымдарды электронды нұсқаға көшіру, оқырмандарды кітапханаға тарту, электронды каталогты жетілдіру, кітапхананың техникалық жағынан жабдықталу мәселелері және т.б. қарастырылды.