Жазушы Кәдірбек Сегізбаймен сұхбат

16 ақпан күні «Zoom» платформасы арқылы белгілі жазушы, публицист, баспагер, Қазақстанның еңбек сіңірген қайраткері, Әуезов атындағы әдеби сыйлықтың  лауреаты, «Парасат» орденінің иегері  жерлесіміз Кәдірбек Сегізбаймен сұхбат өтті. Сұхбат қаламгердің 2021 жылы «Абай әлемі» сериясымен жарық көрген «Жап-жасыл әлем» кітабы турасында өтті. Автор кітаптың шығуына мұрындық болған ШҚО әкіміне алғысын айтып, аталмыш повесінің жазылу тарихын баян етті. Әңгіме барысында жазушы «Біз қалада тұрамыз» романының айтпақ ойын тарқатып берді. Жалпы қонағымыз не жазса да өмірде болған оқиғаға негіздейтінін баса айтып өтті. Шығармашылық шеберханасының қыр-сырын айтқан жазушы алдағы уақыттағы жоспарлары мен толғантатын тақырыптарын да тілге тиек етуді ұмытпады. Сөз соңында қаламгер туған өңірі шығыс еліне үлкен сәлемі мен зор ілтипатын білдіріп әңгімені тәмамдады.