Әлемнің жарығын сыйладың сен маған: мерекелік кеш

3 наурыз күні Абай атындағы кітапханада «Отбасы орталығы» ҚҚ-мен бірлесіп Халықаралық әйелдер күніне арналған мерекелік кеш өтті. Мерекелік шараға қаламыздың дамуына ерекше үлес қосқан семейлік қыз-келіншектер, оның ішінде мемлекеттік органдар мен экономика саласының өкілдері, медицина қызметкерлері мен мұғалімдер, қоғам қайраткерлері, т.б.болды.
Жиын басында қаланың танымал азаматтары Н.Исаев, А.Коновалов, О.Сартаев, А.Алтайбаев, В.Следников, Ғ.Ахунжанов барша әйелдер қауымын көктем мерекесімен құттықтады.
Абай атындағы кітапхананың қызметкерлері Бауыржан Игілік пен Қуандық Кенжебек домбыра мен гитараның сүйемелдеуімен нәзік, лирикалық әндерді орындады. Шара қонақтары үшін татар өнер мектебінің кішкентай солистері ана туралы ән шырқаса, балет мектебінің жас балеринасы әсем би биледі.
Шара аясында мәдениет пен өнер, білім және медицина саласының танымал әйелдері туралы мерзімді басылымдар, белгілі жазушылар мен ақындардың жинақтары, басты кейіпкерлері әйелдер болған шығармалар қойылған кітап көрмесі ұйымдастырылды. Кітап көрмесін Шығыс Қазақстанның көрнекті әйелдерінің портреттерінің фотогалереясы толықтырды.
Кеш барысында қыз-келіншектерге 8 наурыз көктем мерекесімен көптеген жылы лебіздер айтылып, құттықтаулар айтылды.