Тағдыр көзі: әдеби-сазды кеш

Ағымдағы жылдың сәуір айының 18-ші жұлдызында ШҚО Абай атындағы кітапхананың маманы, әріптесіміз Бауыржан Игіліктің мәдениет және тілдерді дамыту бөлімінің ұйымдастыруымен қалалық мәдениет сарайында «Тағдыр көзі» атты жеке шығармашылық кеші өтті.
Кешке қаламыздың құрметті азаматтары, алдыңғы толқын ақын ағалар, мәдениет ошақтарының басшылары мен өнер майталмандары және ақынның қадірлі оқырмандары қатысты.
Әдеби-сазды кештің ашылуын жасаған ақынның соңынан ерген іні-қарындастары шағын қойылым қойып, өлеңдерін мәнерлеп оқыса, өнердегі достары тыңдарман құлағына жағар ән әуелетті. Өз кезегінде кештің шырайын келтіруге негізгі арқау болған “Дариғай” жастар театрының актерлары Әділжан Серікқалиұлы мен Ернар Қалым және басқада аталмыш театр актерлары ақын достарының әдемі өлең өрнегін оқырман жүрегіне жеткізіп оқып берді.
Әдемі кеш барысында ақынның сөзіне жазылған және жастар арасында кең тараған жанға жағымды әндер айтылып, шара соңына қарай көпшілік асыға күткен кеш иесі сахна төріне шығып өзінің лирикалық, философиялық, жаңа және бұрын жазған жырларын толғанта оқып берді.
Өлең кешінің соңында ел алдына ақынның өнердегі ағалары және мәдениет ошақтарының басшылары, ҚР мемлекеттік сыйлығының иегері Тыныштықбек Әбдікәкімұлы, өнер жанашыры Адай Зейнолдаұлы, Семей облыстық тарихи-өлкетану мұражайының директоры Қайрат Сабырбайұлы, мәдениет және тілдерді дамыту бөлімінің басшысы Назерке Мәулітқызы, Мұқан Төлебаев атындағы музыкалық колледжінің директоры Сайлау Жұмағазыұлы және ақынның өнердегі ұстазы Семей қаласының құрметті азаматы Дәметкен Серікбайқызы шығып ақ тілектерін ақтарып, жылы лебіздерін білдірді. Тыныштықбек Әбдікәкімұлы ақынның бір өлеңін оқыса, Адай Зейнолдаұлы жас дарынға «Тұрсынғазы Рахимов атындағы қордың» төс белгісін тақты.